स्वतन्त्र उम्मेदवार जोशीको प्रधानमन्त्रीलाई जवाफ– ढिलो भइसक्यो

बझाङ: कैलाली निर्वाचन क्षेत्र नम्बर ३ को प्रदेशसभा(२) मा बागी उम्मेदवारी दिएका नेपाली कांग्रेसका नेता गोविन्दराज जोशीले प्रधानमन्त्री शेरबहादुर देउवालाई उम्मेदवारी फिर्ता लिन ढिलो भइसकेको बताएका छन्। 

धनगढीस्थित पार्टी सभापति समेत रहेका देउवासँग भएको भेटमा जोशीले कार्यकर्ताको भावनाअनुसार आफ्नो उम्मेदवारी भएको बताउदै फिर्ता लिन नसकिने बताएका हुन्। सोमबार दिउँसो प्रधानमन्त्री देउवाले जोशीलाई धनगढीस्थित निवासमा बोलाएर उम्मेदवारी फिर्ता लिन आग्रह गरेकोमा उनले फिर्ता गर्न नसकिने जवाफ फर्काएका थिए। 

‘प्रधानमन्त्री ज्यूले उम्मेदवारी फिर्ता लिएको घोषणा गरेर गठबन्धन र पार्टीलाई सहयोग गर भन्नुभएको थियो,’ जोशीले भने, ‘मैले सबै नेता, कार्यकर्तासँगको सरसल्लाहमा उहाँहरुकै भावनाअनुसार उम्मेदवारी दिएको हुँ। अब फिर्ता सक्दैन भनेको छु।’ भेटमा देउवाले जोशीलाई पार्टी छाड्ने निर्णयबाट पछाडी हट्दै पार्टीमा पुगाएको योगदानलाई बचाउन पनि आग्रह गरेका थिए।