केदारस्यूँलाई बझाङ उद्योग वाणिज्य संघ कप २०७९ काे उपाधि

बझाङ सदरमुकाम चैनपुरमा लाग्ने शिलदेवी मेलाको अवसरमा आयोजना गरिएको जिल्लाकै ठूलो पुरस्कार राशिको भलिबल प्रतियोगिताको उपाधि पुरुषतर्फ केदारस्यूँ गाउँपालिकाले र महिलातर्फको छबिसपाथीभेरा गाउँपालिकाले जितेका छन्।
उद्योग वाणिज्य संघ बझाङको आयोजनामा असोज ३० गतेदेखि सुरु भएको प्रतियोगिताको शनिबार फाइनल खेलमा पुरुषतर्फ केदारस्यूँले छबिसपाथीभेरालाई पराजित गर्‍यो।

सुरुवाती २–२ सेट जितेका दुवै टिमबीच पाँचौं सेटमा कडा प्रतिस्पर्धा भएको थियो। अन्तिम सेट केदारस्यूँले १७–१५ ले जित्दै उपाधि उचालेको हो। विजेता टिमले १ लाख ३१ हजार १ सय ११ रुपैयाँ, ट्रफी, मेडल र प्रमाणपत्र प्राप्त गरेको छ भने उपविजेता छबिसपाथीभेराले ७५ हजार १ सय ११ रुपैयाँ, ट्रफी र प्रमाणपत्र प्राप्त गर्‍यो। पुरुषतर्फ तृतीय भएको मष्टा गाउँपालिकाले ५१ हजार १ सय ११ रुपैयाँ प्राप्त गर्‍यो। केदारस्यूँका सुरेश मल्ल उत्कृष्ट खेलाडी घोषित भए।

महिलातर्फ छबिस गाउँपालिकाले मष्टा गाउँपालिकालाई हराउँदै पहिलो भएको हो। २–२ सेट जितेका दुवै टिमले पाँचौं सेटमा प्रतिस्पर्धा हुँदा मष्टालाई १५—१३ सेटमा पराजित गर्दै छबिसपाथीभेरा विजयी भयो। महिलातर्फ प्रियंका भण्डारी उत्कृष्ट खेलाडी घोषित भइन्। महिलातर्फ प्रथम पुरस्कार ५१ हजार १ सय ११ र दोस्रो पुरस्कार ३१ हजार १ सय ११ रुपैयाँ, ट्रफी, मेडल र प्रमाणपत्र रहेको छ।

पुरुष तर्फ

प्रथम - केदार स्यु गाउँपालिका

द्वितीय - छबिस पाथिभेरा गाउँपालिका

तृतीय - मष्टा गाउँपालिका

चौथो - बुङ्गल नगरपालिका

महिला तर्फ

प्रथम - छबिस पाथिभेरा गाउँपालिका

द्वितीय - मष्टा गाउँपालिका

तृतीय - जयपृथ्वी नगरपालिका

चौथो - बिथ्थड चिर गाउँपालिका

शिलदेवी मेलाको अवसरमा उद्योग वाणिज्य संघले प्रत्येक वर्ष आयोजना गर्ने यो प्रतियोगिताले खेल क्षेत्रको विकासमा योगदान दिएको भन्दै पालिका प्रमुखहरूले प्रशंसा गरेका थिए। प्रतियोगितामा पुरुषतर्फ १६ र महिलातर्फ ९ वटा टिम सहभागी रहेका उद्योग वाणिज्य संघका अध्यक्ष दानबहादुर सुर्मेलीले बताए। यो प्रतियोगिता हेर्न जिल्लाका विभिन्न ठाउँबाट सदरमुकाम चैनपुरमा दर्शक ओइरिएका थिए।