बझाङकाे मष्टा गाँउपालिकामा जिप दुर्घटना हुँदा ६ जनाको घटनास्थलमै मृत्यु

बझाङ: बझाङमा जिप दुर्घटना हुँदा छ जनाको घटनास्थलमै मृत्यु भएको छ । बुधबार अपराह्न सदरमुकाम चैनपुरबाट मष्टा गाउँपालिका– २, खेतकोट जाँदै गरेको सु.प.प्र ०१–००१ च ११७ नम्बरको जिप दुर्घटना भएको हो । अहिलेसम्म छ जनाको शव फेला परेको जिल्ला प्रहरी कार्यालय बझाङले जनाएको छ । मृत्यु भएका मध्ये ३ जनाकाे सनाखत भएकाे छ ।

मष्टा गाँउपालिका वडा नं २ खेतकोटका लोकेन्द्र खडकाकी १३ बर्षिया छोरी सम्झाना खडका, सोहि ठाँउका हेमराज खडकाका १५ बर्षिया छोरा रोशन खडका, महेश कठायतकी श्रीमती २८ बर्षिया बसन्ती धामीको मात्र सनाखत भएको छ ।  जिपमा कति जना सवार थिए भन्ने एकीन भएको छैन । घटनास्थलबाट ८ जना घाइतेहरूको उद्धार गरी जिल्ला अस्पताल सिमखेतमा पठाउने काम भइरहेको छ ।

जिल्ला सदरमुकाम चैनपुरमा लाग्ने सिलदेवी मेला हेरेर फर्किँदै गरेका यात्रु चढेको जिप दुर्घटनामा परेको जिल्ला प्रहरी कार्यालय बझाङका प्रमुख डिएसपी जागेश्वर भण्डारीले जानकारी दिनुभयो । जिप सडकबाट ५ सय मिटर तल खसेर भीरमा अड्किएको छ ।