बझाङबाट नेपाली काँग्रेस प्रदेशसभा ख को समानुपातिक तर्फ विपन्न समुदायकी शान्ति महत सिफारिस

बझाङ : नेपाली काँग्रेस बझाङले मङ्सिर ४ गते हुने प्रतिनिधि र प्रदेशसभा सदस्यका लागि सम्भावित उम्मेदवारहरूको नाम सिफारिस गरेको छ । काँग्रेस बझाङले प्रतिनिधिसभा र प्रदेश सभाका लागि प्रत्यक्ष र समानुपातिक तर्फका उम्मेदवारहरूको नाम सिफारिस गरेको छ । प्रदेश सभा तर्फ २ वटा निर्वाचन क्षेत्र रहेकोमा प्रदेश निर्वाचन क्षेत्र (ख) मा समानुपातिक तर्फ विपन्न समुदायकी शान्ति कुमारी महतको नाम पनि सिफारिस गरेको छ । लामो समय देखि काँग्रेसको राजनीतिमा सक्रिय महतको यसपालि प्रत्यक्ष तर्फ निर्वाचन लड्ने धोको थियो । तर राजनैतिक वृत्तमा देखिएको गठबन्धनका कारण आफू समानुपातिकमा सिफारिस हुनुपर्ने बाध्यता रहेको उनी बताउँछिन् । पछिल्ला दुई वटा महाधिवेशनमा महाधिवेशन प्रतिनिधि समेत रहेकी महत सामाजिक काममा सक्रिय छिन । जिल्लाकै विपन्न तथा अति पिछडावर्गको रूपमा देखिएको ज्यावनी समुदायकी महत सिफारिस हुनेमा सो समुदायकी पहिलो महिला समेत हुन । यसपालि पार्टीले आफूलाई न्याय गर्ने विश्वास रहेको उनको भनाइ छ ।  

सिद्धनाथ बहुमुखी क्याम्पस कञ्चनपुर बाट नेवि सङ्घको सदस्य भई राजनीतिमा लागेकी महतले राजनैतिक तथा सामाजिक सेवाका क्षेत्रमा विभिन्न जिम्मेवारी बहन गरेकी छन् । सुरुवातमा महतले केही बर्ष संस्थामा काम गरिन तर पछि राजनीतिमा निकै सक्रिय भएपछि जागिर छोडेर पुर्णरुपमा राजनीति तर्फ होमिइन । सप्रोस् नेपाल, जिल्ला विकास समिति अन्त्रगतको एलजिसिडिपी कार्यक्रम र सामुदायिक अध्ययन केन्द्रमा सामाजिक परिचालकको काम गर्दै समाजका हरेक समस्या सँग परिचित महतले यसपालि समानुपातिक तर्फ उम्मेदवार बन्ने निर्णय गरेकी छन् ।

विभिन्न पेसागत सङ्गठनको नेतृत्व पनि सम्हालेकी महत २०७४ को स्थानीय तहको निर्वाचनमा दुर्गाथली गाउँपालिका उपाध्यक्षमा पराजित हुन पुगिन । सबै थोक त्यागेर पुर्णरुपमा राजनीतिमा होमिएकी उनी नेपाल ट्रेड युनियन, नेपाल शिक्षक सङ्घ, नेपाल महिला सङ्घ, महिला अधिकारका लागि महिला समूह, एकल महिला समूह, मेची महाकाली बुहारी संयुक्त आवाज लगायतका सङ्गठनमा विभिन्न जिम्मेवारी बहन गरी सकेकी महत अहिले महासमिति सदस्य रहेकी छन् । आफू हरेक समुदायका समस्या प्रति जानकार रहेकाले पिछडा वर्ग, महिला हिंसा  लगायतका विषयमा प्रदेश सभामा आवाज बुलन्द गर्न पनि योग्य भएकाले यस पालीको निर्वाचनमा पार्टीले मलाई न्याय दिने उनी बताउँछिन् ।