मृतक शिक्षकका परिवारलाई सिगास ६ र ७ का वडाध्यक्षले २ वर्षसम्म आर्थिक सहयोग गर्ने 

• राजेन्द्र सिंह साउँद

बैतडी: बैतडीको सिगास गाउँपालिकामा बौलाहा कुकरले टोकेर मृत्यु भएका भनिएका नरबहादुर साउँदको परिवारलाई दुइ जना वडाध्यक्षले दुई वर्षसम्म आर्थिक सहयोग गर्ने  प्रतिवद्धता जनाएका छन् । सिगास- ७ न्वाघरमा रहेको बालकृष्ण माध्यमिक विद्यालयका लेखापाल ३६ वर्षीय नरबहादुर साउँदको परिवारलाई वडा नम्बर ६ का वडाअध्यक्ष तेजबहादुर साउँद र वडा नम्बर ७ का वडाध्यक्ष कर्ण बहादुर साउँदले आर्थिक सहयोग गर्ने घोषणा गरेका हुन्। 

गत वैशाख महिनामा बौलाहा कुकुरले टोकेको केही महिनापछि लक्षण देखिएका उनको अस्पतालमा राखेर उपचार भइरहेको र उपचार सम्भव नभएपछि अस्पतालबाट घर लैजाँदै गर्दा शुक्रबार बाटोमा नै मृत्यु भएको थियो।

शुक्रबार साउँदको अन्तेष्टिपछि मसानघाटमै पुगेर सिगास -६ का वडा अध्यक्ष तेजबहादुर साउँद र ७ का वडाध्यक्ष कर्ण बहादुर साउँदले आफूले पाउने सेवा सुविधाबाट २ वर्षसम्म मासिक २/२ हजारका दरले मृतकका छोरा छोरीलाई पढ्न लेख्न राहात पुगोस् भन्ने उद्देश्यले आर्थिक सहयोग गर्ने घोषणा गरेको मृतकका आफन्तले बताएका छन् । 

बौलाहा कुकुरले टोकेर मृत्यु भएका नरवहादुर साउदँको घरमा आमाबुबा, श्रीमती, एक छोरा र एक छोरी गरि ५ जना परिवार सदस्य रहेका छन् ।  

साउँदको मृत्युपछि परिवारको बिचल्ली भएको मृतक साउँदका छोरा तेज साउँदले बताए । बुबाको कमाइले सम्पूर्ण परिवार पालिएको  र अब आफूलाई ठूलो चोट लागेको उनको भनाई छ । मृतक लेखापालकी छोरी बालकृष्ण माध्यमिक विद्यालयमा कक्षा १० मा अध्ययनरत छन् भने उनका छोरा सेती प्राविधिक शिक्षालय दिपायल डोटीमा पहिलो वर्षको ओभरसियरको अध्ययन गरिरहेका छन् ।