एमालेको चुनावी सभामा आएका एक किशोरको बाहुली खोलामा डुबेर मृत्यु

बझाङ : नेकपा एमालेको चुनावी सभामा आएका एक किशोरको बाहुली खोलामा डुबेर मृत्यु भएको छ । मृत्यु हनेमा बित्थडचिर गाउँपालिका ४ देउलेखका करिब १७ वर्षीय कमल बोहरा रहेका छन् । सोमबार नेकपा एमालेले सदरमुकाम चैनपुरस्थित बाहुली खोला किनारमा आयोजना गरेको चुनावी सभामा सहभागी हुन देउलेखबाट आएका बोहरा बाहुली खोलामा तर्न नसकी खोलामा डुबेका थिए ।  पानी डुबेका उनीसँग अरु कोही नहुँदा उनको उद्धार हुन नसकी मृत्यु भएको हो । 
सोमबार (आज) दिउँसो करिब ४ बजे बोहराको घटनास्थलमै मृत्यु भएको हो । मृतक बोहोरालाई पोस्टमार्टमको लागि जिल्ला अस्पताल सिमखेत लगिएको जिल्ला प्रहरी कार्यलय बझाङले जनाएको छ ।  

एमालेको चुनावी सभालाई सम्बोधन गर्न अध्यक्ष केपी शर्मा ओली, उपाध्यक्ष विष्णु पौडेल र एमाले नेता भानुभक्त ढकाल बझाङ आउने कार्यक्रम तय भएपछि एमालेले जिल्लाभरबाट र्‍यालीसहित मतदाता प्रदर्शन गरेको थियो । त्यही भीडमा बित्थडचिरबाट आएका बोहरा केपी शर्मा ओलीले सम्बोधन गरिरहेका बेला खोलमा डुबेका थिए । कार्यक्रम भइरहेका बेला मृत्यु भएका किशोरलाई नभेटि अध्यक्ष ओली काठमाडौं फर्किएपछि बिरोध भइरहेको छ । 

मृतक बोहरा वित्थडचिरको देवेश्वरी माध्यामिक विद्यालयमा कक्षा १० मा अध्ययनरत रहेको बित्थडचिर गाउँपालिका वडा नम्बर ६ का वडाध्यक्ष हर्क धामीले बताए ।

पार्टीको कार्यक्रममा जनमास देखाउन बालबालिका समेत प्रयोग नगर्न हुने कार्यक्रममा सहभागी तल्कोटका देव रोकायाले बताए ।

बालबालिकासम्बन्धी ऐनमा राजनीतिक प्रयोजनका लागि बालबालिकालाई सङ्गठित गर्ने वा हडताल, बन्द, चक्काजाम, धर्ना, र जुलुसमा प्रयोग गर्न नहुने भनी उल्लेख गरिएको भए पनि नेपालका राजनीतिक दलले भने खुलेयाम बालबालिको दुरुपयोग गरिरहेको पाइन्छ ।