सुदूरपश्चिममा म्यादी प्रहरीका लागि साढे २९ हजार आवेदन

बझाङ; आगामी वैशाख ३० गते हुने स्थानीय तहको निर्वाचनका लागि सरकारले सुदूरपश्चिम प्रदेशमा ९ हजार ९३७ जना म्यादी प्रहरी माग गरेकाे थियो। तर त्यसको झण्डै तीन गुणा बढी २९ हजार ६८२ जनाले आवेदन दिएको सुदूरपश्चिम प्रदेश प्रहरी कार्यालयले जनाएको छ । ती मध्ये सबैभन्दा बढी कैलालीमा ११ हजार २२२ जनाले म्यादी प्रहरी बन्नका लागि जिल्ला प्रहरी कार्यालयमा आवेदन दिएका छन्। कैलालीमा दुई हजार ४५७ जना म्यादी प्रहरीको माग गरिएको छ। उता कञ्चनपुरमा १ हजार ४६९ जना म्यादी प्रहरी माग भएकोमा ५ हजार ९३५ जनाको आवेदन परेको प्रहरी कार्यालयले जनाएको छ। यस्तै डोटीमा एक हजार ३९५, अछाममा दुई हजार १४ र बाजुरामा एक हजार ६६७ जनाले म्यादी प्रहरीका लागि निवेदन दिएका छन्। त्यसैगरी बझाङमा १ हजार ६५६ जना, बैतडीमा २ हजार २४ जना, डडेल्धुरामा १ हजार ७७१ र दार्चुलामा एक हजार ९५८ जनाले आवेदन दिएका छन् ।