एमसीसी टेबुल गर्न खोजे सडकमा आगो बाल्छौं : जिल्ला सेक्रेटरी विराट

बझाङ : अमेरिकी सहयोग परियोजना एमसीसीको विरोधमा नेपाल कम्युनिष्ट पार्टी नेकपाले केदारस्युँको झोतामा प्रदर्शन गरेका छन् । नेपाल कम्युनिष्ट पार्टी नेकपाको आयोजनामा झोता बजारसहित पौडी बजारमा प्रदर्शन गरिएको हो ।

प्रदर्शनमा नेकपाका सयौं नेता कार्यकर्ता सहभागी भएका थिए ।  प्रदर्शनपछि नेकपाले विरोधसभा कार्यक्रम गरेको थियो । विरोधसभा कार्यक्रममा बोल्नुहुँदै नेकपाका केन्द्रिय सल्लाहकार समिति सदस्य तथा संविधानसभा सदस्य शंकर खड्काले एमसीसी नेपालका कम्युनिष्टहरुका लागि घातक हुने  र यो एक किसिमको सैन्य सन्धि जस्तै भएको बताउनुभयो ।

उहाँले नेपालको संविधान भन्दा माथि हुने परियोजनाले नेपालको हित नगर्ने र जबरजस्ति धम्की दिएर संसदबाट पारित गराउन लाग्ने अमेरिकी षड्यन्त्र हामी सबै लागेर बिफल बनाउनुपर्ने जोड दिनुभयो । साथै उहाँले नेपाली जनताको रगत पसिनाले बनेको संविधानभन्दा माथि भएकाले नै यो संसदबाट पारित गराउन नेपाली कांग्रेस र केही दलहरु लागी परेको हुँदा जनतालाई अझैं दबाब दिन आग्रह गर्नुभयो ।

यस्तै नेकपाका जिल्ला सेक्रेटरि विराटले जनता र नेपाल कम्युनिष्ट पार्टी एमसिसिको विरुद्धमा रहेको र यदि एमिसिसि संसदमा पारित गर्न खोजे अब जनताले सडकमा आगो बाल्नेसमेत चेतावनी दिनुभयो । देशका लागि घातक हुँदा हुँदै पनि केही दलाल व्यक्ति र पार्टीले नेपालमा एमसीसी लागु गर्न खोजेको सेक्रेटरी विराटको तर्क छ । 

बुधबार नै ६ दलिय मोर्चाले नेपाल बन्द पनि गरेको छ । एमसीसी ससंदबाट पारित हुन लागेको र यो सम्झौताले देश संकटमा पर्न सक्ने भएको भन्दै बन्द गरिएको हो । बन्दका कारण बजार, शैक्षिक संस्था र सवारी साधन चल्न सकेका थिएनन् । वेलुका ५ बजेबाट भने रोकिएका सवारी साधनहरु गन्तव्य तर्फ लागेका छन् ।