जिल्ला प्रहरी कार्यालय बझाङको हिरासतमा रहेकी एक वृद्धाकाे मृत्यु

बझाङ: जिल्ला प्रहरी कार्यालय बझाङको हिरासतमा रहेकी एक वृद्धाकाे मृत्यु भएकाे छ । केदारस्युँ गाउँपालिका–२ की ७७ वर्षीया विष्णादेवी रावल हिरासत कक्षमै बेहाेस भएपछि अस्पताल लैजाने क्रममा मृत्यु भएकाे प्रहरीले जनाएकाे छ । आज बिहान एक्कासि बेहोस भएकी रावललाई जिल्ला अस्पताल सिमखेत लैजाँदै गर्दा मृत्यु भएकाे जिल्ला प्रहरी कार्यालय बझाङका प्रमुख ज्ञानबहादुर बिष्टले जानकारी दिए ।

उनका अनुसार बिहान चिया खाने क्रममा रावल बेहाेस भएकी थिइन् । उनलाई अस्पताल पुर्‍याएलगत्तै चिकित्सकले मृत घाेषित गरेका थिए । रावल र उनका छोरा जयबहादुर कर्तव्य ज्यान मुद्दामा २० कात्तिकदेखि प्रहरी हिरासतमा थिए । जयबहादुरकी श्रीमती ७ कात्तिकमा झुण्डिएकाे अवस्थामा मृत फेला परेकी थिइन् । उनका माइती पक्षले आमाछोरा मिलेर हत्या गरेको भन्दै प्रहरीमा जाहेरी दिएका थिए ।