एक महिनादेखि अवरुद्ध बझाङको जयपृथ्वी राजमार्ग सञ्चालनमा आयो

बझाङ: एक महिनादेखि अवरुद्ध बझाङको जयपृथ्वी राजमार्ग सञ्चालनमा आएको छ । बेमौसमी वर्षासँगै आएको बाढीपहिरोका कारण अवरुद्ध बझाङ सदरमुकाम चैनपुर जोड्ने जपयृथ्वी राजमार्ग एक महिनापछि शनिबारबाट सञ्चालनमा आएको हो । ३१ असोजदेखि ३ कात्तिकसम्म परेको बेमौसमी वर्षाका कारण सेती नदीले छविसपाथीभेरा गाउँपालिकाको जाल्याबगर र केदारस्युँ गााउँपालिकाको नारुगौडामा सडक बगाएको थियो । 

नारुगौडामा नेपाली सेनाको टोलीले विष्फोट गरेर चट्टान काटेर नयाँ ट्रयाक खोलेपछि राजमार्ग सञ्चालनमा आएको हो ।  जाल्या बगरमा सेती नदीको धार नै परिवर्तन गरेर राजमार्गलाई सञ्चालनमा ल्याइएको छ । राजमार्ग सञ्चालनमा आएसँगै शनिबार दिउँसोदेखि साना तथा ठूला गाडी नियमित रुपमा चल्न थालेका छन् । सबैभन्दा ठूलो समस्या जाल्या बगरमा भएकाले सेती नदीलाई डाइभर्ट गरेर वैकल्पिक बाटो सञ्चालनमा ल्याइएको प्रमुख जिल्ला अधिकारी मोहन अधिकारीले जानकारी दिए ।