आफुले बचत फिर्ताको माग राख्दै हुलाक बचत बैङ्कका बचतकर्ताहरु धर्नामा

जिल्ला हुलाक कार्यालय बझाङ मार्फत संचालन भएको हुलाक बचत बैङ्कमा बचतकर्ताहरुले संघर्षका कार्यक्रमहरु सार्वजनिक गरेको छ । हुलाक बचत बैङ्कमा आफुले बचत गरेको रकम २ बर्ष देखी नपाएको भन्दै शुक्रबार प्रमुख जिल्ला अधिकारी मोहन अधिकारी मार्फत बचतकर्ताहरुले नेपाल सरकारलाई ज्ञापन पत्र बुझाएका थिए । आफुहरुले बचत गरेको रकम भुक्तानी गरिदिन शुक्रबार ज्ञापन पत्र बुझाएका बचतकर्ताहरुले आईतबार जिल्ला हुलाक कार्यालयमा बचतकर्ताले धर्ना दिएका छन ।

बचतकर्ताहरुले सम्वन्धीत निकायमा पहल गरिदिन आग्रह गर्दै, संघर्ष समितीले ज्ञापन पत्र बुझाएको हो । आफुहरुले खाइ नखाई बैङ्कमा जम्मा गरेको रकम आफुहरुले नपाउदा संघर्ष समिती गठन गरी आन्दोलनका कार्यक्रम अगाडी बढाउन बाध्य भएको संघर्ष समितीका संयोजक खडक बोहराले बताउनु भयो ।

सरकारले यथासिघ्र आफुहरुका माग पुरा गरिदिन पनि आग्रह गरेका छन । तत्कालीन कार्यालय प्रमुख रणबहादुर कडायत र खरिदार शिवराज उपाध्यायले १ हजार ७ सय १ जना बचतकर्ताको ५ करोड ७८ लाख ६४ हजार रुपैयाँ अपचलन गरेका थिए । जिल्ला हुलाक कार्यालयका प्रमुख तथा केहि कर्मचारीको मिलोमतोमा बैङ्कमा बचत गरेको करिब ५ करोड रुपैयाँ हिनामिना भएपछि अख्तीयारमा समेत मुद्धा पनि परेको थियो ।

तर अदालतले एक महिना नपुग्दै फागुन १२ गते तत्कालीन कार्यालय प्रमुख रणबहादुर कडायतसँग १५ लाख र खरिदार शिवराज उपाध्यायसँग १२ लाख धरौटी लिएर रिहा गरेको थियो ।