चैनपुर जोड्ने मुख्य सडकखण्ड भाँसिएपछि बाहुली खोला किनारमा डाइभर्सन बनाइयो 

बझाङ : सदरमुकाम चैनपुर जोड्ने मुख्य सडकखण्ड अवरुद्ध भएको ६ दिन भइसक्दा पनि सुचारु हुन नसकेपछि बाहुली खोलामा डाइर्भसन बनाइएको छ । सदरमुकाम चैनपुरबाट झण्डै एक किलोमिटरको दुरीमा पर्ने सिमखेत बसपार्क नजिकै सडक भाँसिएपछि अवरुद्ध बनेको जयपृथ्वी राजमार्ग सुचारु हुन नसकेको हो ।

जिल्ला अस्पताल, स्वास्थ्य कार्यालय, मालपोत तथा जयपृथ्वी नगरपालिकाको कार्यालय जाने मुख्यबाटो नै अवरुद्ध हुँदा पनि सम्बन्धित निकायको तदारुकता नदेखिएको यात्रुको गुनासो छ । चैनपुर वा बाहुलीगाड वारी कोही सिकिस्त बिरामी भएको खण्डमा एम्वुलेन्स वा सवारी साधनबाट अस्पताल पुर्‍याउने बाटो नै नभएको नागरिक अगुवा धर्मजंङबहादुर सिंहले बताउनुभयो । 

दिनरात काम गरेर मर्मत गर्नुपर्ने सडकमा सिमित मान्छेलाई काम लगाएर कछुवा गतिमा काम भइरहेको छ । यस्तै गतीमा काम हुने हो भने सदरमुकाम जोड्ने जयपृथ्वी राजमार्ग खुल्न महिनादिन लाग्ने देखिन्छ ।

यता जिल्ला प्रशासन कार्यालयले भने काम धमाधम भइरहेको बताएको छ । धेरै तलबाट पर्खाल लगाउनु पर्ने भएका कारण केही ढिलाइ भएको प्रसाशनको भनाइ छ । सडक डिभिजन कार्यालय टाढा भएका कारण केही ढिलो भएको भएपनि अबको एकहप्ताभित्र राजमार्ग सञ्चालनमा आउने प्रमुख जिल्ला अधिकारी मोहन अधिकारीले बताउनुभयो ।

अहिले सिमखेत बसपार्क हुँदै बाहुली खोलाको किनारमा डाइभर्सन खोलेर यातायात संञ्चालनमा ल्याइएको प्रजिअ अधिकारीले बताउनुभयो । सिमखेत वसपार्कबाट बाहुली खोलाको किनारहुदै बाहुली खोलामाथी बनेको पक्की पुल जोड्ने गरी अहिले डाइभर्सन निर्माण गरिएको छ ।