तलब वृद्धि नभएको भन्दै थलाराका विद्यालय कर्मचारी र बाल शिक्षा सहजकर्ता आन्दोलनमा उत्रिए

बझाङ :  थलारा गाउँपालिकाका विद्यालय कर्माचारी र बाल शिक्षा सहजकर्ताले सरकारले तोके अनुसार तलब वृद्धि नभएको शुक्रबार थलारा गाउँपालिकामा धर्ना दिएका छन् ।

नेपाल सरकारले गत बजेट भाषणमा न्यूनतम तलब १५ हजार दिने घोषणा गरे पनि गाउँपालिकाले उक्त निर्णय कार्यान्वयन नगरेको भन्दै शुक्रबार विद्यालय कर्मचारी र बाल शिक्षा सहजकर्ताहरूले गाउँपालिकाको भवन अगाडी ३ घण्टा धर्ना दिएका हुन् ।
 
आफूहरूको आन्दोलन जारी रहेको र माग पूरा गराउन शुक्रबार धर्ना दिएको विद्यालय कर्मचारी संगठनका अध्यक्ष चन्द्रदेव जोशीले बताए । जोशीका अनुसार गाउँपालिका अध्यक्ष भुवनेश्वर उपाध्याय तलब वृद्धि गर्न सकारात्मक देखिएकाले हाललाई धर्ना रोकिएको छ ।

नेपाल सरकारले न्युनतम १५ हजार तलब घोषणा गरेपछि बझाङका केही स्थानीय तहहरूले उक्त निर्णय कार्यान्वयन गरे पनि थलारा गाउँपालिकाले सम्बोधन नगरेको आन्दोलनरत कर्मचारीको भनाइ छ । थलारा गाउँपालिकाभरि करिब ८० जना बालशिक्षा सहजकर्ता र बाल शिक्षा कर्मचारी रहेका छन् ।