अवरुद्ध जयपृथ्वी राजमार्ग खुल्यो तर जोखिम उस्तै

बझाङ : निरन्तर बर्षातका कारण ठाउँ-ठाउँमा अवरुद्ध जयपृथ्वी राजमार्ग शनिबार खुलेको छ। बुधबार रातिदेखि अवरुद्ध जयपृथ्वी राजमार्गमा अलपत्र सवारी साधन  आ-आफ्नो गन्तव्यतिर लागेका छन् । 

राजमार्ग अन्तर्गत जयपृथ्वी नगरपालिका -७ कचाली खोला, माल्नालाग्ने भीर, छबिसपाथिभेराको सुङ्गाला बालुवाटार लगायतका ठाउँमा पहिरो आएर सडक अवरुद्ध भएको थियो । 

दुई तर्फबाट डोजर लगाएर बाटो खुलाईएको डिएसपी रुपक खड्काले बताए । उनले भने,'सडक आज लामो प्रयासपछि खुलाइयो तर अझैं पानी परिरहेकाले फेरि अवरुद्ध हुनसक्छ । अझैं यात्रु तथा सवारी चालकले सावधानीकासाथ यात्रा गर्न आवश्यक छ ।' 

आइतबार फेरि भारी पानी पर्ने माैसम पूर्वानुमान महाशाखाको अनुमान भएकाले सडक फेरि अवरुद्ध हुने सम्भावना प्रबल रहेको उनले थपे । 

शाखा सडक विस्तार, घुम्ती चाैडा पार्ने काम र साँघुरो ठाउँमा सडक चाैडा पार्ने काम भइरहेको हुँदा यस बर्खायाममा जयपृथ्वी राजमार्गमा बढी बाढी पहिरो र भूक्षयको सम्भ‍ावना रहेको सडक डिभिजन कार्यालय बैतडीले जनाएको छ ।