जयपृथ्वी राजमार्ग पुन: अवरुद्ध, मेल ढाँगा र कचाली खोलामा पहिरो

बझाङ : जयपृथ्वी राजमार्ग पुन: अवरुद्ध भएको छ । खोड्पे-बझाङ जयपृथ्वी राजमार्ग अन्तर्गत तमैल नजिकको मेल ढाँगा र कचाली खोलामा पहिरो आउँदा राजमार्ग पुन: अवरुद्ध भएको हो । दुबै ठाउँमा पहिरो आउने क्रम नरोकिएको र पानी परिरहेको हुँदा राजमार्ग खुलाउन असहज भएको प्रहरीले जनाएको छ । जिल्ला प्रहरी कार्यालय बझाङका अनुसार सडक खुलाउन डोजर तयारी अवस्थामै भए पनि पानी नरोकिदा सडक सुचारु गर्न असहज भएको हो । यी दुबै ठाउँ करिब एक सय मिटर प्रभावित पार्ने गरि पहिरो आएको छ । यसअघि कचाली खोला र ढोल्यामोडमा पहिरो आउँदा राजमार्ग अवरुद्ध भएको थियो । 

निरन्तर पहिरो किन ?
अघिल्ला बर्षहरुको तुलनामा यस वर्ष जयपृथ्वी राजमार्ग बढी अवरुद्ध हुने गरेको छ । पछिल्लो चार दिन यता राजमार्ग ६ पटक अवरुद्ध भएको छ । यस वर्ष सडक चाैडा पार्ने काम र घुम्ती चाैडा पार्ने काम भएको हुँदा पहिरोको जोखिम बढेको सडक डिभिजन कार्यालय बैतडीले जनाएको छ । सडक खुलाउने प्रयास भए पनि दोहोरिएर पहिरो जाने गरेका कारण सडक स‌चालनमा ल्याउन नसिकएको हो । लगातार बर्षा भईरहेको र बेला बेला पहिरो खस्ने क्रम नरोकिएकाले जोखिम रहेको डिभिजन कार्यालय बैतडीका प्रमुख बताए । उनले भने पहिरो पन्छाउनका लागि प्रयास त भएको छ । तर लगातारको बर्षाका कारण काम गर्न जोखिम छ । काम गर्दा गर्दै पहिरो खस्ने गरेको छ । बर्षा नरोकिए सम्म काम गर्न नसकिने उनको भनाई छ ।