हिम पहिरोमा परि दार्चुलामा एक जना बेपत्ता

दार्चुला : दार्चुलाको अपी हिमाल गाउँपालिकामा एक जना यार्सागुम्बा संकलक हिम पहिरोमा परि वेपत्ता भएका छन् । अपी हिमाल गाउँपालिका ४ नौपाटा घर भएका मोहनसिंह ठेकरे बेपत्ता भएका हुन् । गत जेठ ५ गते अपी हिमाल गाउँपालिका ३ क्षतिको नाउरखाल वनमा यार्सागुम्बा संकलन गर्न गएका ठेकरे हिउँ पहिरोमा परि बेपत्ता भएका हुन् ।

हिउँ पहिरोमा परि वेपत्ता भएका ठेकरेको छाता मात्र भेटिएको छ ।  स्थानीय र प्रहरी खोजीमा खटिए पनि ठेकरे अझैं नभेटिएको अपी हिमाल गाउँपालिका ४ का वडा अध्यक्ष रविन्द्रसिह बोहराले बताए ।

अहिले दार्चुलामा अपि नाम्पा संरक्षण क्षेत्र कार्यालय दार्चुलाले यार्सागुम्बा संकलनको लागि संकलन अनुमति नदिए पनि संकलकहरु यार्सा संकलनका लागि लेकमा भरिएका छन् । कोभिड १९ जिल्ला संकट व्यवस्थापन केन्द्रको बैठकले कोरोनाको संक्रमण बढेको कारण यो वर्ष तत्काल यार्सागुम्बा संकलन अनुमति नदिन आग्रह गरेको थियो ।

सोही अनुसार अपि नाम्पा संरक्षण क्षेत्र कार्यालय दार्चुलाले संकलन अनुमति रोकेको थियो । तर अहिले दार्चुलाको व्यास, अपी हिमाल गाउँपालिकाका यार्सागुम्बा पाइने पाटनहरुमा संकलकहरु गएका छन् ।