बझाङमा सक्रिय संक्रमित संख्या ८ सय ५७ जना पुग्यो, चैनपुरमा सबैभन्दा बढी संक्रमित

बझाङ : बझाङमा सोमबार थप ८२ जनामा कोरोना भाइरसको संक्रमण पुष्टि भएको छ । जिल्ला अस्पतालको प्रयोगशालामा गरिएको पिसिआर परिक्षणमा ७३ जना र एन्टिजेन परिक्षण गर्दा ८ जनामा गरि ८१ जनामा कोरोना भाइरसको संक्रमण देखिएको हो । यो सँगै जिल्लामा कोरोनाको दोस्रो लहरपछि मात्रै संक्रमित हुनेहरुको संख्या ९ सय ६४ पुगेको छ । 

सोमबार जिल्ला अस्पतालका १ जना, सुर्मा गाउँपालिकाका २ जना, जयपृथ्वी नगरपालिकाका ४१ जनामा कोरोनाको संक्रमण पुष्टि भएको हो । जयपृथ्वी नगरपालिकामा देखिएका मध्यै प्राय: सदरमुकाम चैनपुरका रहेका जिल्ला अस्पतालको कोरोना प्रयोगशालाले जनाएको छ। हाल चैनपुरमा धेरै संक्रमित रहे पनि कोरोना चेकजाँच गर्न नजाने गरेको देखिएको छ ।जयपृथ्वी नगरपालिकाभित्र मात्र ३ सय २७ जनाको कोरोना संक्रमण भएको छ भने २० जना कोरोना संक्रमण मुक्त भएका छन् । अहिले नगरपालिकामा ३ सय ३ जना सक्रिय संक्रमित रहेका छन् । ४ जना संक्रमितले ज्यान गुमाइसकेका छन् । यस्तै छबिसपाथिभेरा गाउँपालिकाका १ जना, खप्तड छान्ना गाउँपालिकाका १३ जनामा पनि कोरोना संक्रमण पुष्टि भएको छ । यस्तै केदारस्युँ गाउँपालिकाका १ जना, बुङ्गल नगरपालिकाका १२ जना र विथ्थडचिर गाउँपालिकाका १० जनामा कोरोना संक्रमण देखिएको छ । 

यसैबीच जिल्लामा थप २१ जनाले कोरोना जितेसँगै कोरोनाबाट मुक्त हुनेको संख्या ९३ पुगेको छ । अब जिल्लामा ८ सय ५७ जना सक्रिय संक्रमित रहेका छन् ।