फेरि देखियो साइपालका तीन जनामा कोरोना संक्रमण

बझाङ : साइपाल गाउँपालिकामा तीन जनामा कोरोना भाइरसको संक्रमण पुष्टि भएको छ । शुक्रबार गरिएको एन्टिजेन्ट परिक्षणका क्रममा साइपाल गाउँपालिका वडा नं. १ का क्रमश: २२, ३० र ३४ वर्षीय तीन जना पुरुषमा कोरोना भाइरसको संक्रमण पुष्टि भएको गाउँपालिकास्थित काँडा स्वास्थ्य चौकीका इन्चार्ज विरेन्द्र बोहराले बताउनुभयो । 

उनीहरुमा सामान्य स्वास्थ्य समस्या देखिएपछि शुक्रबार एन्टिजेन परिक्षण गर्दा कोरोना संक्रमणको पुष्टि भएको बोहराले बताउनुभयो । कोरोना देखिएका मध्ये एक जना साइपाल गाँउपालिकाले स्थापना गरेको हेल्थ डेस्कमा यार्सा संकलन गर्न जानेहरुको स्वास्थ्य परिक्षण गर्नका लागि खटिएका स्वास्थ्यकर्मि हुन् भने अन्य दुई जना त्यहाँका स्थानीय रहेका छन् । 

स्थानीय प्रदिप बोहराका अनुसार उनीहरुलाई गाउँपालिका भन्दा बाहिरबाट यार्सा संकलन गर्न जानेहरुबाट संक्रमण फैलिएको हुन सक्ने जनाइएको छ । संक्रमण देखिएका तीनै जना अहिले साइपाल गाँउपालिका वडा नं. १ र २ ले निर्माण गरेको क्वारेन्टाइनमा बसेको साइपाल गाउँपालिकाबाट स्थानीय प्रदिप बोहराले जानकारी दिनुभएको छ ।

गाउँपालिकाले समयमा नै व्य‍वस्थापन गर्न नसक्दा साइपाल गाउँपालिकामा समेत कोरोनाको जोखिम बढेको छ । जिल्ला कै दुर्गम गाँउपालिका भएका कारण कोभिडका विरामीहरुलाई समस्या हुने भन्दै स्थानीयहरुमा त्रास छाएको बोहराले बताउनुभयो ।

 स्थानीयले सुरुमा नै गाँउपालिकाभन्दा बाहिरकालाई भित्रन नदिन सुझाव दिएको भए पनि गाउँपालिकाले राजस्वको लोभले संकलकलाई अनुमति दिदा संक्रमण फैलने सम्भावना बढेको हो । यसअघि पनि साइपाल गाँउपालिको धुलीमा रहेको प्रहरी चौकीका कार्यालय सहयोगीमा पनि कोरोना पुष्टी भएको थियो । पहिलो लहरमा भने साइपालमा संक्रमित देखिएका थिएनन् । साइपाल गाउँपालिकामा कम जनसंख्या रहेको छ । त्यहाँका स्थानीय भेडाच्याङ्ग्राम पालन र जडीबुटी बेचविखन गरेर जीविकोपार्जन गर्ने र विदेश नजाने हुँदा संक्रमण फैलन खतरा कम रहेको थियो ।