कोरोना अपडेट : निको हुने दर ८७.२, मृत्यु दर १.२

काठमाडौँ : कोरोना सङ्क्रमण दर बढे संगै मृत्यु हुनेको सङ्ख्या दैनिक बढे पनि निको हुनेहरूको सङ्ख्या पनि कम छैन । नेपालमा स्वास्थ्य तथा जनसङ्ख्या मन्त्रालयका अनुसार शुक्रबारसम्म ३ लाख ७७ हजार ६ सय ३ जना सङ्क्रमित भएका छन्।

नेपालमा परीक्षण गरेकामध्ये संक्रमितहुने दर १४.५ प्रतिशत रहेको छ। त्यसै गरी सङ्क्रमितमध्ये मृत्युदर १.२ प्रतिशत रहेको छ। नेपालमा निको हुनेको दर ८७.२ रहेको छ।

काठमाडौँमा २५ हजार सङ्क्रमित
काठमाडौँमा सक्रिय सङ्क्रमितको सङ्ख्या २५ हजार ९ सय ४० छ भने भक्तपुरमा ८ हजार १४ छ। त्यसै गरी ललितपुरमा सक्रिय सङ्क्रमितको सङ्ख्या ५ हजार ४ सय २९ रहेको छ।

सङ्क्रमित हुनेमा २० देखि ३९ वर्ष उमेर समूहकै बढी छन्। नेपालमा पुरुषको संक्रमणदर ६२.९१ छ भने महिला सङ्क्रमण हुने दर ३७.०९ प्रतिशत छ।  हालसम्म मृतकको सङ्ख्या ३ हजार ५ सय ७९ पुगेको छ।