बझाङमा एचपीभी खोप अभियान: तीन दिनमा ९५.५४ प्रतिशत किशोरीले लगाए खोप

बझाङ जिल्लामा मानव पेपिलोमा भाइरस (एचपीभी) विरुद्धको खोप अभियान प्रभावकारी रूपमा सञ्चालन भइरहेको छ। स्वास्थ्य कार्यालय बझाङका अनुसार हालसम्म कुल लक्ष्य १२०३५ मध्ये ११८५८ जना किशोरीहरूले खोप लगाइसकेका छन्, जसले ९५.५४% कभरेज देखाएको छ।

अभियानको तेस्रो दिनसम्म १४६५ किशोरीहरूले खोप लगाएका छन्। तीमध्ये विद्यालय जाने कक्षा ६ का २५५ छात्रा, कक्षा ७-१० का ११४४ छात्रा तथा विद्यालय बाहिर रहेका ११-१४ वर्ष उमेर समूहका ६६ किशोरीहरू रहेका छन्।

एचपीभी खोप गर्भाशय क्यान्सरको रोकथामका लागि प्रभावकारी मानिन्छ। स्वास्थ्य कार्यालयले लक्ष्य समूहका सबै किशोरीलाई खोप लगाउने उद्देश्यका साथ अभियानलाई अझ व्यापक बनाउन स्थानीय निकाय तथा विद्यालयहरूसँग सहकार्य गरिरहेको छ।

यस अभियानलाई प्रभावकारी बनाउन स्वास्थ्यकर्मी, शिक्षक, अभिभावक, र स्थानीय समुदायको ठूलो सहयोग रहेको स्वास्थ्य कार्यालयले जनाएको छ। बाँकी किशोरीलाई पनि खोप लगाउनका लागि निरन्तर प्रयास भइरहेको छ।