५३ जनाले चैनपुरमै पाए एथलेटिक्स प्रशिक्षक प्रशिक्षण तथा रेफ्री तालिम

"राष्ट्रका लागि खेलकुद, स्वास्थ्यका लागि खेलकुद" भन्ने मूल नाराका साथ आयोजित एथलेटिक्स प्रशिक्षक प्रशिक्षण तथा रेफ्री तालिम बझाङमा सम्पन्न भएको छ। यही पुस १४ गतेदेखि सुरु भएको तालिम पुस २० गते शनिबार औपचारिक रूपमा समापन गरिएको हो।

बझाङको जिल्ला समन्वय समिति सभाहलमा आयोजित तालिमले जिल्लाको खेलकुद क्षेत्रलाई नयाँ उचाइमा पुर्‍याउने अपेक्षा गरिएको छ। तालिमको आयोजना जिल्ला खेलकुद विकास समितिले गरेको हो। सात दिनसम्म चलेको यस तालिममा बझाङका विभिन्न स्थानीय तहका ५३ जना खेलकुद प्रशिक्षक र खेलप्रेमीहरूको सहभागीता रहेको थियो।

कार्यक्रमका प्रमुख अतिथि जिल्ला समन्वय समिति उपप्रमुख कृष्ण बिष्ट र अध्यक्षता जिल्ला खेलकुद विकास समिति अध्यक्ष पुष्पलाल रोकाया ज्वालाले गर्नुभएको थियो। कार्यक्रममा विशेष अतिथिका रूपमा स्थानीय खेलकुदप्रेमी, पत्रकार, तथा समाजसेवीहरूको उपस्थिति रहेको थियो।

अन्तर्राष्ट्रिय स्तरका प्रशिक्षकको सहभागिता
तालिममा सहभागीहरूलाई अन्तर्राष्ट्रिय स्तरका प्रशिक्षक धनिराम चौधरी र सुदूरपश्चिम प्रदेशका अनुभवी एथलेटिक्स प्रशिक्षक रामचन्द्र जोशीले प्रशिक्षण दिनुभएको थियो। प्रशिक्षकहरूले आधुनिक एथलेटिक्सका विधिहरू, रेफ्रीको भूमिका, खेलकुदमा अनुशासन र नेतृत्व विकासका विषयमा प्रशिक्षण प्रदान गरेका थिए। सहभागीहरूले प्राविधिक ज्ञानसँगै खेलकुदको व्यावहारिक पक्षमा पनि महत्वपूर्ण अनुभव हासिल गरेको बताएका छन्।

तालिममा सहभागी स्थानीय तहका प्रतिनिधिहरूले यस्तो तालिमको आवश्यकता र प्रभावकारिता उल्लेख गर्दै यसले गाउँस्तरसम्म खेलकुदको प्रचारप्रसारमा सहयोग पुग्ने बताए। सहभागी सन्तोष विष्टले भने, "यो तालिमले हामीलाई खेलकुदको प्राविधिक पक्ष बुझ्न र स्थानीयस्तरमा खेलकुद कार्यक्रम आयोजना गर्न सक्षम बनाएको छ।"

समापन समारोहमा ऐन दौल्यालले कार्यक्रम सञ्चालन गर्नुभएको थियो। प्रमुख अतिथि उपप्रमुख बिष्टले तालिमबाट प्रशिक्षित व्यक्तिहरूले जिल्लाको खेलकुद क्षेत्रमा दीर्घकालीन योगदान दिन सक्ने विश्वास व्यक्त गर्नुभयो। अध्यक्ष पुष्पलाल रोकायाले भने, "खेलकुदले शारीरिक तथा मानसिक स्वास्थ्यलाई मजबुत बनाउनुका साथै युवा पुस्तालाई सकारात्मक बाटोमा उन्मुख गराउँछ। " 

जिल्ला खेलकुद विकास समितिले यस्ता तालिमहरूलाई नियमित रूपमा सञ्चालन गरी जिल्लामा खेलकुद क्षेत्रलाई सुदृढ बनाउने योजना अघि सारेको छ। यस तालिमले एथलेटिक्सका प्रशिक्षक र रेफ्रीहरूलाई प्राविधिक रूपमा बलियो बनाउनुका साथै बझाङको खेलकुद क्षेत्रमा नयाँ आयाम थप्ने विश्वास गरिएको छ। अध्यक्ष पुष्पलाल रोकायाले थप्दै भने, "ढिलै भए पनि प्रतिबद्धता  गरेका कार्यले पूर्णता पाइरहेका छ्न् बाँकी प्रतिबद्धता गरेका कार्यक्रम पनि छिट्टै पुरा गर्नेछु । आगामी माघ २१ गते देखि २७ गतेसम्म बझाङमा कबड्डी प्रशिक्षक प्रशिक्षण तथा रेफ्री तालिम पनि सञ्चालन हुँदैछ ।  "

"राष्ट्रका लागि खेलकुद, स्वास्थ्यका लागि खेलकुद" नाराका साथ सम्पन्न यो तालिमले बझाङको खेलकुद क्षेत्रमा ऐतिहासिक योगदान पुर्‍याएको छ। सहभागी प्रशिक्षक र रेफ्रीहरूले अब स्थानीयस्तरका खेलकुद गतिविधिहरूलाई प्रभावकारी बनाउने अपेक्षा गरिएको छ। खेलकुदमार्फत स्वस्थ समाज निर्माण गर्ने लक्ष्यले यो तालिम प्रेरणादायी रहेको प्रमाणित भएको छ।