बाहुली खोला पक्की पुलमाथि नहरको पानी खुला रूपमा बग्दै, संरचनात्मक आयुमा गम्भीर असर पर्ने खतरा

बझाङको जयपृथ्वी राजमार्ग अन्तर्गत पर्ने बाहुली खोलाको पक्की पुलमा लामो समयदेखि बाहुली खोलाबाट ल्याइएको नहरको पानी खुला रूपमा छोडिँदै आएको छ । चैनपुर बजार र चौड बजारलाई जोड्ने मुख्य पुलमा नहरको पानी खुला रूपमा बगिरहँदा यसको संरचनात्मक आयुमा गम्भीर असर पर्ने प्राविधिकहरूको भनाई छ । 

पक्की पुलको निर्माणमा प्रयोग गरिएका सामग्री निरन्तर पानीको सम्पर्कमा रहँदा कमजोर बन्ने जोखिम रहने र विशेषगरी, कंक्रिट र फलाम पानीको सम्पर्कमा आउँदा क्षय हुने, कंक्रिट भित्रको फलाम खिया लाग्ने र समयअगावै कमजोर हुने खतरा हुने इन्जिनियर रामबहादुर मल्लले बताउनुभयो । 

चैनपुर र चौड बजारका स्थानीयहरूले यो समस्या लामो समयदेखि प्रशासनको ध्यानाकर्षण गराउँदै आएको तर हालसम्म यसमा कुनै ठोस कदम नचालिएको स्थानीयहरुको भनाई छ ।

जिल्ला प्रशासन कार्यालय र स्थानीय तहले यस समस्यालाई गम्भीर रूपमा लिँदै तत्काल प्राविधिक अनुगमन र उचित समाधानका लागि पहल थाल्नुपर्ने स्थानीयहरूको माग छ । पुल सुदृढीकरणका लागि आवश्यक कदम समयमै चाल्न नसके भविष्यमा ठूलो आर्थिक नोक्सानसहित जनधनको क्षति हुने सम्भावना रहेको छ ।