छविसपाथिभेराको बालुवाटारमा सुख्खा पहिरो: विद्युत सेवा प्रभावित

जयपृथ्वी राजमार्गअन्तर्गत छविसपाथिभेरा गाउँपालिका-१ बालुवाटारमा गए राति खसेको सुख्खा पहिरोले राष्ट्रिय प्रसारण लाइनको विद्युत् सेवा अवरुद्ध पारेको छ। पहिरोले ठूलो ढुंगासहित विद्युतको तीन मध्ये एक तार चुडाउँदा जिल्लाका अधिकांश स्थानहरूमा विद्युत आपूर्ति अवरुद्ध भएको हो।

तार चुडिएर अन्य दुई तारमा छोएपछि एउटा लाइन हाल सञ्चालनमा रहेको छ भने अर्को लाइन पूर्ण रूपमा अवरुद्ध छ। यसका कारण बझाङका धेरै क्षेत्रमा विद्युत सेवा प्रभावित भएको छ।

प्राधिकरणका अनुसार विद्युत् आपूर्ति मर्मतका लागि प्राविधिक टोली खटाइएको छ। विद्युत सेवा पूर्ण रूपमा सुचारु हुन केही समय लाग्ने जनाइएको छ। यस क्षेत्रका स्थानीयवासीले विद्युत अवरुद्ध हुँदा दैनिक जीवनमा असुविधा भोगिरहेका छन्।

जयपृथ्वी राजमार्ग आसपास पहिरोको जोखिम बढिरहेका बेला यस्ता घटनाबाट हुने सम्भावित क्षतिलाई रोक्न तत्काल उचित कदम चाल्नुपर्ने आवाज स्थानीयस्तरमा उठ्न थालेको छ।