बझाङमा ट्राफिक प्रहरीद्वारा '१ मिनेट कार्यक्रम’ सञ्चालन

दुर्घटना न्यूनीकरणको उद्देश्यले जिल्ला ट्राफिक प्रहरी कार्यालय बझाङले मंसिर ४ गते '१ मिनेट कार्यक्रम’ सञ्चालन गरेको छ। कार्यक्रममा सवारी साधनका चालक र यात्रुहरूसँग सवारी सुरक्षा र ट्राफिक नियमको बारेमा जानकारी गराइएको छ।

कार्यक्रम अन्तर्गत चालकहरूलाई सवारी गति सीमा, यान्त्रिक चेकजाँच, सिट क्षमताको पालना, र चालकको स्वास्थ्य अवस्थाबारे सचेत गराइएको थियो। साथै, सवारी दुर्घटना न्यूनीकरणमा चालकको मुख्य भूमिका र ट्राफिक नियमको पूणर् पालना आवश्यक रहेको विषयमा जानकारी दिइएको थियो।

सडक प्रयोग गर्दा ध्यान दिनुपर्ने कुराहरू, ट्राफिक चिन्ह तथा संकेतको महत्व, सुरक्षित यात्रा र आम नागरिक तथा यात्रुको भूमिकाबारे पनि सम्झाइ बुझाइ गरिएको थियो।

कार्यक्रमको नेतृत्व ट्राफिक प्रहरी कार्यालय प्रमुख प्रहरी निरीक्षक विनोद कुमार बिष्टले गरेका थिए। ट्राफिक सचेतनाले दुर्घटनाको जोखिम घटाउने र सुरक्षित यात्रा सुनिश्चित गर्ने लक्ष्य राखेको कार्यालयले जनाएको छ।