छबिसपाथिभेरा ५ का कलक धामीमाथि सामूहिक आक्रमण, पाँचजना प्रहरीको नियन्त्रणमा

छबिसपाथिभेरा गाउँपालिका वडा नम्बर ५ बस्ने कलक धामीमाथि कार्यालयमा सुतिरहेको अवस्थामा सामूहिक आक्रमण भएको छ। घटना हिजो बेलुकी करिब ७:३० बजे भएको हो। वडा कार्यालयमा खाना खाएर सुतिरहेका धामीमाथि ६/७ जनाको समूहमा आएका व्यक्तिहरूले बाहिरबाट गालीगलौज गर्दै कार्यालयको छतबाट हाम फालेर सांघातिक आक्रमण गरेका हुन्।

आक्रमणकारीहरूमा छबिसपाथिभेरा गाउँपालिका वडा नम्बर ३ बान्निकोटका गगन बोहोरा (अन्दाजी ३५ वर्ष), बर्ख बोहोरा (३२ वर्ष), हिक्मत बोहोरा (२८ वर्ष), सञ्जय बोहोरा (२५ वर्ष) र सुरेश बोहोरा (२४ वर्ष) रहेको खुलेको छ। उनीहरूलाई कोट चौघानपाटा प्रहरी चौकीले नियन्त्रणमा लिएको छ।

आक्रमणमा घाइते भएका धामीको दाँत, नाक, मुख र हातमा चोटपटक लागेको छ। उनको हाल जिल्ला अस्पताल बझाङमा उपचार भइरहेको छ । घटनाबारे थप अनुसन्धान भइरहेको प्रहरीले जनाएको छ।