चाडपर्व लक्षित गरि ट्राफिक प्रहरी कार्यालय बझाङले गर्‍यो चार ठाउँमा यात्रु सहायता कक्ष स्थापना

नजिकिँदै गरेको दशैं, तिहार तथा छठ लगायतका पर्वलाई लक्षित गरेर जिल्ला ट्राफिक प्रहरी कार्यालय बझाङले ट्राफिक व्यवस्थापन विशेष सुरक्षा योजना सार्वजनिक गरेको छ।

ट्राफिक प्रहरीको अधिकतम परिचालन, प्रभावकारी व्यवस्थापन, शीघ्र र सहज सेवा पहुँचको व्यवस्था मिलाएर चाडपर्वलाई सुरक्षित, मर्यादित र व्यबस्थित बनाउने उद्देश्यका साथ जिल्ला ट्राफिक प्रहरी कार्यालय बझाङले चाडपर्व विशेष सुरक्षा योजना लागू गरेको जनाएको छ।

चाडपर्वमा हुने सवारी चाप व्यवस्थापन, दुर्घटना न्यूनीकरण तथा यात्रुलाई पर्न सक्ने विभिन्न समस्यालाई सम्बोधन गरि सहज यात्राको प्रबन्ध मिलाउन जिल्ला जिल्ला ट्राफिक प्रहरी कार्यालय सिमखेत आसपास दुई स्थानमा र अस्थायी ट्राफिक प्रहरी पोष्ट बागथला, अस्थायी ट्राफिक प्रहरी पोष्ट झोतामा एक/एक स्‍थानमा यात्रु सहायता कक्षको स्थापना गरी सेवा सञ्चालन गरिएको जनाइएको छ ।

चाडपर्वको समयमा हुने सवारी चाप व्यवस्थापन र दुर्घटना न्यूनीकरणको लागि चेकजाँचलाई समेत कडाइ पार्ने योजनामा उल्लेख छ। आज बझाङका चालक, सह-चालक, सवारी धनी, यातायात व्यवसायी, यात्रु तथा सर्वसाधारणहरुको उपस्थितिमा यी योजना बनाइएको जिल्ला ट्राफिक प्रहरी कार्यालय बझाङले जनाएको छ ।