बझाङका एक युवा जसले आफन्त भेट्न नपाउँदै कोरोना कारण ज्यान गुमाए  

बझाङ : 'बझाङका एक व्यक्ति बेहोस् अवस्थामा वैशाख १४ गते सेती प्रादेशिक अस्पतालमा पुगे । उनी बोल्न नसक्ने अवस्थामा एक्लै अस्पताल पुगेका थिए । त्यतिवेला उनको साथमा आफन्त तथा साथिहरु कोही पनि थिएनन् । उनी उमेरले २६ वर्षका युवा थिए । अस्पतालले एन्टिजेन्ट परिक्षण गर्दा उनमा कोरोना पोजेटिभ देखियो । उनको अवस्था निकै नाजुक भएकाले उनलाई डाक्टरले नाम ठेगाना सोधपुछ गर्दा बोल्न सकेनन् । अस्पतालको आइसियु राखेर उनको उपचार त थालियो तर वैशाख २० गते राति १० बजे अन्तिम विदाईका हात हल्लाए । हाम्रो सम्पर्कमा उनका कोही पनि आफन्त आएनन् । उनको शव व्यवस्थापनका लागि अस्पतालले जिल्ला प्रशासनलाई  जिम्मा लगाएको छ। बझाङ र समथिङ् के भण्डारी मात्रै भनेका हुन् हामीले उनको विस्तृत ठेगाना थाहा पाएनाैं ।,' सेती प्रादेशिक अस्पतालका सूचना अधिकारी दिलिप श्रेष्ठले द जेपी डेलीसँग भने ।

त्यसपछि जेपी डेलीले ती युवाको ठेगाना खोज तलास गर्दा उनी केदारस्युँ गाउँपालिका-१ जुवाली खेतका रहेको तथ्य उनका आफन्तबाट पत्ता लगायो । ती युवा धनगढीमा ट्रिपर डाइभर भएर लामो समयदेखि बसिरहेका थिए । उनका बुवाआमा छैनन् । घरमा अवस्था निकै नाजुक रहेको र दाजुभाईहरु भए पनि उनीहरु आआफ्नै काममा व्यस्त भएकाले धनगढी जान नसकेको उनका आफन्तले जनाए । जिल्ला जिल्लामा लागू भएको निषेधाज्ञा र आर्थिक समस्या हुँदा आफन्त त्यहाँसम्म जान नसकेको जानकारी द जेपी डेलीलाई थाहा हुन पुग्यो । उनको शव जिल्ला प्रशासन कार्यालयले व्यवस्थापन गरिसकेको जनाएको छ ।