बझाङमा गयरातिदेखि पुन: सडक र विद्युत अवरुद्ध

मौसममा बदली भएसँगै बझाङकाे राष्ट्रिय प्रशारण लाइन गयरातिबाट अवरुद्ध भएको छ । डडेल्धुरा आसपास नेपाल विद्युत प्राधिकरणकाे राष्ट्रिय प्रशारण लाइनमा समस्या आएको बझाङ विद्युतले जनाएको छ । लाइनमा के कसरी समस्या आयो भन्ने जानकारी नआएकोले सुचारू गर्न ढिलाइ हुने बझाङ बितरण केन्द्रले जनाएको छ । 

यसैबीच खोड्पे-बझाङ जयपृथ्वी राजमार्ग पनि तीन ठाउँमा पहिरोका कारण अबरुद्ध भएको छ । गयरातिबाट जयपृथ्वी राजमार्ग अन्तर्गत  ३ ठाउँमा पहिरो खसेका कारण अबरुद्ध भएको जिल्ला प्रहरी कार्यालय बझाङले जनाएको छ ।

उक्त राजमार्ग अन्तर्गत बालुवाटार (सुङगाला) ,जालेबगरस्थित तमैल आसपास र सुबेडामा सडकमाथिबाट पहिरो खस्दा रातिबाट राजमार्ग अबरुद्ध भएको प्रहरीले जनाएको हाे ।

सडक अवरुद्ध हुँदा मुख्य राजमार्गमा वारपार गर्ने ठूलासाना सवारीसाधन ठप्प छन् । विभिन्न ठाउँमा पहिरो खसेकाले जयपृथ्वी नगरपालिका र सडक डिभिजन कार्यालयको गरि दुईवटा मेसिन खटाइएको जिल्ला प्रहरी कार्यालयका डिएसी युवराज भण्डारीले बताउनुभयो ।