बझाङका तीन पालिकामा माछा मार्न नपाइने

बझाङका स्थानीय तहले धमाधम माछा मार्न बन्देज गर्न थालेका छन् । विभिन्न अप्राकृतिक र प्राकृतिक तरिकाले माछा मार्ने क्रम बढेपछि माछाहरुको अस्तित्व र बासस्थान लोप हुने अवस्थामा पुगेको भन्दै पालिकाले सूचना निकाल्दै माछा मार्न बन्देज लगाएका हुन् । जयपृथ्वी नगरपालिकाबाट सुरु भएको बन्देज कार्यक्रम क्रमशः अहिले थलारा गाउँपालिका र केदारस्युँ गाउँपालिकाले पनि अनुसरण गरेका छन् । स्थानीय तहको जलचर तथा जैविक विविधता संरक्षण सम्बन्धमा व्यवस्था गर्न बनेको ऐन बमोजिम माछा बन्देज गरिएको पालिकाले जनाएका छन् । माछाले फुल पार्ने तथा प्रजनन् गर्ने समय भदौ, असोज, फाल्गुन र चैत्र महिनामा रहेकोले पछिल्लो समय अत्याधिक विनासकारी तरिकाबाट करेन्ट लगाउने, जैविक तथा रसायनिक विषादी प्रयोग गर्ने, महाजाल, पासा र नदि खोला थुनछेक गरि माछा मार्दा पालिका क्षेत्रमा रहेको नदि र खोलामा माछाको संख्या चिन्ताजनक रुपमा घटिरहेको पालिकाहरुले निकालेको सूचनामा उल्लेख छ । 
जलीय जैविक विविधताको स्वास्थ्यको सूचकको रुपमा रहेका माछा लगायत अन्य जलचरका सरक्षण र दिगो उपयोग नगरिए भविष्यमा हाम्रो बातावरणमा थप नकारात्मक असर पर्ने भएकोले पनि माछा मार्न बन्देज गरिएको पालिकाहरुको भनाई छ । जयपृथ्वी नगरपालिकाले तमैलदेखि सुनीगाड दोभान र वाउलीगाड खारावगर क्षेत्रसम्म, थलारा गाउँपालिकाले वडा नं. ९ को जहारीगाड दोभान र सेती नदी देखि राक्सेगाड सम्म, वडा नं. ६ राक्सेगाड दोभानदेखि थलारी गाडमा पर्ने सम्पूर्ण वडा, थलारी गाड देखि वडा नं. ३, ४, १ सम्मको रेगम गाड दोभान, र केदारस्यूँ गाउँपालिकाले वडा न १ जुवालीखेतदेखि कालङ्गा नदि र सेति नदिका दोभान क्षेत्र, वडा न १ को देउरा देखि रायल सम्म सेति नदि क्षेत्र, रायल देखि वडा न ९ को जुइलि गाड दोभान क्षेत्र र वडा न ९ को जुइलीगाड देखि सुडिखोला नदि क्षेत्र सम्म माछा मार्न बन्द गरिएको जनाएका छन् । सूचनाको अवज्ञा गरि कुनै पनि साधन वा तरिकाले माछा मारेको पाइएमा ऐन बमोजिम कार्वाही गरिने पालिकाहरुको भनाई छ ।