बझाङका ग्रामिण भेग सम्पर्क बिहीन, बाढी पहिरोका सूचना पाउन असहज

निरन्तरको झरीले सोलार प्यानलमा घाम नलाग्दा बझाङका ग्रामिण भेग सम्पर्क बिहीन भएका छन् । बझाङमा प्राय: जसो टेलिफोन टावरहरु सोलार सिस्टममा चलिरहेकाले लामो समय घाम नलाग्दा टेलिफोन सेवा पूर्ण रुपमा अवरुद्ध भएको छ ।

बझाङका खप्तडछान्नाका तीनवटा, तल्कोट र मष्टाका दुइवटा, साइपालमा एक वटा, छबिसपाथिभेरामा दुइवटा,  दुर्गाथलीमा दुईवटा,  केदारस्युँमा दुई वटा,  वित्थडचिरमा दुईवटा,  थलारामा एउटा,  बुंगलमा दुइवटा,  सुर्मा एक वटा गरि, जयपृथ्वीको मनाना गरि १९ वटा टेलिफोन टावर सोलारको भरमा सञ्चालन भइरहेका छन् भने जयपृथ्वी नगरपालिकाको हेमन्तवाडा, सदरमुकाम चैनपुर, वडा नम्‍बर ६ को नौरामा, छबिसपाथिभेरा गाउँपालिका वडा नम्बर ६ तथा साविक कँडेलमा र थलारा गाउँपालिका ८ को देबस्थलीमा मात्रै विद्युतबाट नेपाल टेलिकमका टावर सञ्चालनमा रहेका छन् ।

निरन्तर पानी पर्न थालेपछि बझाङका धेरैजसो टावर निस्क्रिय हुँदा गाउँहरु सम्पर्क बिहीन हुँदा समस्या भएको छ । टावर नहुँदा अतिवश्यक पर्दा फोन गर्न र बाढी पहिरोका सूचना पाउन असहज भएको छ । सदरमुकाम चैनपुरमा पनि फोरजी सेवा र ल्याण्डलाइन सेवा मात्रै सुचारु छ भने जिपिआरएस तथा टुजी सेवा अवरुद्ध भएको छ ।