ढुंगा लागेर घाइते भएकी बोहराको उपचारमा समस्या

बझाङ । भिरबाट खसेको ढुंगा लागेर घाइते भएकी एक महिलालाई रकम अभावले उपचारमा समस्या भएको छ । बझाङको विकट साइपाल गाउँपालिका वडा नम्बर-१, की एकल महिला पुनीदेवी बोहराको उपचारमा समस्या भएको हो । शुक्रबार बिहान गाउँनजिकै रहेको गोठबाट गाईलाई घाँस हालेर फर्किंदै गर्दा भिर खसेको ढुंगा लागेर उनी घाइते भएकी हुन् ।

घाइते बोहरालाई स्थानीयले उद्धार गरी दिनभर स्ट्रेचरमा बोकेर शुक्रबार साँझ सदरमुकाम चैनपुरस्थित जिल्ला अस्पताल पुर्‍याएका थिए । जिल्लामा उपचार सम्भव नभएपछि अस्पतालले उनलाई धनगढी रिफर गरेको थियो । धनगढीको अस्पतालमा पनि उपचार नभएपछि अहिले उहाँको काठमाडौं स्थित ट्रमा अस्पतालमा उपचार भइरहेको छ । बोहराको खुट्टा भाँच्चिएको छ, भने रक्तनली फुटेर रगत जमेका कारण खुट्टा काट्नुपर्ने सुझाव चिकित्सकले दिएका छन ।

घाइते बोहराका भतिजा वीरबहादुर बोहराका अनुसार बोहराको उपचारका लागि ठुलो रकम आवश्यक पर्ने र घरको आर्थिक अवस्था कमजोर भएका कारण उपचारमा समस्या भइरहेको छ । चिकित्सकहरुले खुट्टा काट्नु पर्ने बताएका कारण उपचारका लागि आर्थिक अभाव भएको बोरहाले बताउनुभयो । आर्थिक रूपले विपन्न रहेकी पुनीदेवीले ज्याला मजदुरी गरेर घर परिवारको खर्चको जोहो गरिरहनु भएको थियो । आफ्नो उपचारका लागि तीन-चार लाख खर्च लाग्ने चिकित्सकहरुले बताएका कारण उपचारमा सहयोग गरिदिन पुनीदेवी बोहराले आग्रह गर्नुभएको छ ।