सुदूरपश्चिम प्रदेशमै सबैभन्दा कम दुध उत्पादन बझाङमा हुने गरेको तथ्याकं 

बझाङ : बझाङमा सुदूरपश्चिममा प्रदेशमै सबैभन्दा कम दुध उत्पादन हुने गरेको तथ्याकं सार्वजनिक भएको छ । भेटेनरी अस्पताल तथा पशुविज्ञ केन्द्र र पशुपंक्षी तथा मत्स्य विकास निर्देशनालयको तथ्यांकअनुसार प्रदेशमै सबैभन्दा कम दुध उत्पादन बझाङमा हुने गरेको पाइएको हो ।

निर्देशनालयको तथ्याकं अनुसार गत वर्ष बझाङमा दुई हजार ५३५ लिटर मात्रै दुध उत्पादन भएको छ । सुदूरपश्चिम प्रदेशमा दुई लाख ५५ हजार लिटरभन्दा बढी दुध उत्पादन हुँदा सबैभन्दा बढी दुध उत्पादनमा कैलाली जिल्लाको हिस्सा ३५ दशमलव २३ प्रतिशत र बझाङ जिल्लाको सबैभन्दा कम शून्य दशमलव ९९ प्रतिशत देखिएको छ ।

गत वर्ष जिल्लागत विवरणअनुसार सबैभन्दा बढी कैलालीमा ९० हजार १४५ लिटर दुध उत्पादन भएको छ भने कैलालीपछि कञ्चनपुरमा सबैभन्दा बढी दुध उत्पादन भएको छ । कञ्चनपुरमा ७२ हजार ५२९ लिटर दुध उत्पादन भएको छ । दार्चुलामा १६ हजार ९८८, बैतडीमा १७ हजार ४९६, डडेल्धुरामा १६ हजार ५१५, बाजुरामा १० हजार ६८७, डोटीमा १७ हजार ८७४ र अछाममा ११ हजार ९७ लिटर दुध उत्पादन भएको निर्देशनालयको तथ्यांक छ ।