केदारस्युँ गाउँपालिका - २ को वडा कार्यालयमा स्थानीयद्धारा तालाबन्दी 

बझाङ : बझाङको केदारस्युँ गाउँपालिका वडा नम्बर २ को कार्यालयमा तालाबन्दी गरिएको छ । आज आइतबार दिउँसो वडा कार्यालयको भवन अर्कै स्थानमा सार्ने भन्ने विषयमा विवाद हुँदा स्थानीयले वडा कार्यालयमा तालाबन्दी गरेको जिल्ला प्रहरी कार्यालय बझाङले जनाएको छ ।

हाल वडा कार्यालय काँकडतोलामा रहेको छ । तर वडाका जनप्रतिनिधि लगाएतले वडा कार्यालयको भवन सुमरीखाली भन्ने स्थानमा सार्ने कुरा अघि बढाएका छन् । उक्त बिषयमा सहमती नहुँदा स्थानिय केहि ब्यक्तीहरुले वडा कार्यालय भवनमा तालाबन्दी गरेको जिल्ला प्रहरी कार्यालय बझाङका प्रहरी निरीक्षक दिपेश चौधरीले बताउनुभयो । उहाँले वडा कार्यालयमा तालाबन्दी गरिएको जानकारी प्राप्त हुनासाथ तत्काल प्रहरी चौकी रायलबाट प्रहरी सहायक निरीक्षक गोबिन्द डाँगाको कमाण्डमा–३ जनाको प्रहरी टोली खटिएको र तालाबन्दी खोल्ने पहल भईरहेको बताउनुभयो ।

स्थानियहरुले भने वडा अध्यक्षले जनताको चाहाना विपरित काम गर्दै आफ्नो गाउँ नजिकै वडा कार्यालय सार्ने तयारी गरेको आरोप लगाइरहेको स्थानिय ललित रावलले बताउनुभयो । यस विषयमा वडा अध्यक्ष शेर बहादुर बिष्टसँग बुझ्न खोज्दा उहाँसँग सम्पर्क हुन सकेको छैन् ।