नेपाल टेलिकमको टावरमा विद्युत जडान भएपछि मष्टा गाउँपालिका - १ का स्थानीयलाई सहज 

बझाङ : मष्टा गाउँपालिका वडा नम्बर १ मा अवस्थित नेपाल टेलिकमको टावरमा राष्ट्रिय प्रसारण लाईनको विद्युत जडान गरिएको छ । नेपाल विद्युत प्राधिकरण बझाङ वितरण केन्द्रसँगको सहकार्यमा वडा कार्यालयले डुङ्राकोटमा रहेको टेलिकमको टावरमा राष्ट्रिय प्रसारण लाईनको विद्युत जडान गरेको हो ।

यसअघि सोलारको भरमा सञ्चालन भएको टावरमा विद्युत लाइन जडान गरेपछि निकै सहज हुने वडा अध्यक्ष रामचन्द्र रोकायाले बताउनुभयो । आकाशमा बादल लाग्ने बित्तिकै सोलार बन्द हुने हुँदा टावर जाने र रातीको समयमा नेटवर्क विहिन हुनुपर्ने बाध्यता अब हटेको स्थानिय दलसिहं कठाएतले बताउनुभयो । उहाँले गाउँमा रातीको समयमा फोर जि नेट चल्न समेत सुरु भएको बताउनुभएको छ ।

अहिले मष्टा गाउँपालिकाको वडा नम्बर ३ र ४ मा मात्रै राष्ट्रिय प्रसारण लाईनको विद्युत जडान भएको छ ।वडा नम्बर १ मा भने लाइन विस्तारको काम सुरु भइसकेकाले अब छिट्टै विद्युत जडान गरीने वडा अध्यक्ष रोकायाको भनाई छ । उहाँले रनाडा लगाएतका गाउँहरुमा फोर जि नेटवर्क जडान गर्ने तयारीमा रहेको समेत बताउनुभयो ।