बझाङमा आगलागीबाट एक भैंसी सहित दुई गोठ जलेर नष्ट

बझाङ : बझाङमा आगलागी भएको छ । जिल्लाको मष्टा गाउँपालिका - ७ तल्ला ठकुन्नामा आगलागीबाट एक भैंसी सहित दुई गोठ जलेर नष्ट भएका छन् । शनिबार राति १० बजेको समयमा ठकुन्ना गाउँ नजिकै रहेको स्थानीय धुर्व बोहरा र जब्बरे बोहराको गोठमा एक्कासि आगलागी भएको हो ।

स्थानीयले राति गोठ जलेको देखेपछि त्यहाँ पुगेका थिए । तत्काल आगलागी नियन्त्रणमा लिन नसकेर गोठमा बाँधेको एउटा भैंसी जलेको र अन्य पशुचौपायाहरुलाई बाहिर निकालिएको वडा अध्यक्ष धन बहादुर जेठाराले जानकारी दिए ।

आगलागी के कसरी भयो भन्ने खुलेको छैन । प्रहरी घटनास्थलमा गइरहेको छ । आगलागीबाट बोहराको अनुमानित डेढ लाख बढी क्षति भएको वडा अध्यक्ष जेठाराले बताए ।