बादी समुदायका बझाङका अगुवा रंगे बादी अस्ताए

बझाङ - वादी समुदायको सीप, कला, इतिहास र संस्कृति बारेमा जानकार रंगे बादीको निधन भएको छ । इतिहास मात्रै नभएर पुराना गीत, कथा र साहित्य कण्ठस्थ भएको वादी समुदायका अगुवा रंगे बादीको ६४ वर्षको उमेरमा थलारा गाउँपालिका-५, खोली स्थित आफ्नै घरमा निधन भएको हो ।नयाँ पुस्तालाई मादल, सारंगी र माटोका भाँडा बनाउने सीप सिकाइरहेका रंगे पछिल्लो समय आधुनिक प्रविधिका कारण बादी समुदायको जिविकाको श्रोतको रुपमा रहेको नाचगानको परम्परा र माटोका भाँडा बनाउने पेशा संकटमा परेकोप्रति निकै चिन्तित थिए । 

बादी समुदायको इतिहास, परम्परा र संस्कृतिका जानकारी रंगे बादी कुसल गायक, मादल र सारंगी बादक पनि थिए । रंगे बादीको निधनले बादी समुदायलाई मात्रै नभएर सीप र कला क्षेत्रमै अपुरणीय क्षति पुगेको थलारा गाउँपालिका अध्यक्ष प्रकास रोकायाले बताए । बादी समुदाय परापुर्वकालमा राजा रजौटा र गाउँका ठालु भलादमीका घरमा गई नाचगान गर्ने तथा विवाह व्रतबन्ध आदि चाडवाडमा रमाइलो गरी मागेर खाने अल्पसंख्यक समुदाय भित्र पर्दछ । बझाङमा जयपृथ्वी नगरपालिकाको चैनपुर र थलारा गाउँपालिकाको खोलीमा वादी समुदायकाे बसोबास रहेको छ । जिल्लामा सबै भन्दा कम जनसंख्या भएको यो समुदायका चैनपुरमा १४ र थलारा गाउँपालिकाको खोलीमा ३० गरी ४४ परिवारको  जनसंख्या १९८ मात्रै छ ।