किन लाग्यो केदारस्युँ गाउँपालिका स्तरिय राष्ट्रपति रनिङ शिल्ड प्रतियोगीतामा ८ दिन ?

केदारस्युँ गाउँपालिका स्तरिय राष्ट्रपति रनिङ शिल्ड प्रतियोगीता हिजो ८ दिन लगाएर सम्पन्न भएको छ । केदारस्युँ ९ झोतामा हालसालै बनाएको खेल मैदान र भैरव माद्यामिक विद्यालय प्राङ्गणमा सञ्चालित तेस्रो केदारस्युँ गाउँपालिकास्तिय राष्ट्रपति रनिङ शिल्ड प्रतियोगीता हिजो सकिएको हो ।

 रनिङ शिल्डले धेरै लामो समयावधि लिएको भन्दै चौतर्फी आलोचना भइरहेका बेला केदारस्युँ गाउँपालिकाले भने नियमानुसार खेलाउँदा र बढी विद्यालय भएका कारण ८ दिन लाग्नु स्वाभाविक भएको तर्क गरेको छ । १३ वटा विद्यालयबीच दुई फिल्ड एक ट्र्याक वा दुई ट्र्याक एक फिल्ड नियमानुसार खेलाउँदा समय लागेको गाउँपालिका शिक्षा शाखा संयोजक केशबराज भट्टले बताउनुभयो । उहाँले लसालै बनाएको खेल मैदान र भैरव माद्यामिक विद्यालय प्राङ्गण गरि दुई मैदान खेलाउँदा पनि ८ दिन लागेको तर्क गर्नुभयो । 

दौडमा सबै विद्यालयका छात्रछात्रलाई दौडाउन फिल्ड नभएका कारण दुई हिट बनाएर १३ जना दौडाएको पनि शिक्षा शाखा संयोजक भट्टको भनाई छ । एक दिन उद्घाटन र एक समापनमै बितेको र बाँकी ६ दिन हिउँदे यामका छोटा दिनमा सेती नदी किनारमा हालसालै बनेको खेल मैदानमा ढिलो गरि घाम लाग्ने हुँदा पनि शिल्ड लम्बिएको उहाँको भनाई छ । तर कतिपय केदारस्युँका शिक्षक र स्‍थानीयले भने शिल्डमा धेरै समय व्यतित भएको र विद्यार्थीको पढाइसँगै आर्थिक भार बढी भएको भन्दै आलोचना गरिरहेका छन् । 

 यसपटकको रनिङ शिल्ड भैरब मावि झोता कब्जा गरेको छ । रनिङ शिल्डमा नमादेउ मावि भाडिकोट डाँफ्रु द्धितिय र गर्जेपानी मावि रायल तृतिय भएका छन् । पुस मसान्त पुग्नै लाग्दा बझाङका ११ पालिकाले पालिकास्तिय रनिङ शिल्ड समापन गरेका छन् भने जयपृथ्वी नगरपालिकाले हिजोदेखि सत्यवादी मावि भोपुरमा सञ्चालन गरिरहेको छ । जिल्ला खेलकुद समिति यही पुस मसान्तभित्र सक्न यसअघि परिपत्र गरिसकेको छ ।