खप्तडछान्ना - ३ मा विद्यार्थीका लागि स्वास्थ्य शिविर

बझाङ : खप्तडछान्ना गाउँपालिका वडा नम्बर ३ मा विद्यालय स्तरीय स्वास्थ्य शिविर सम्पन्न भएको छ । जिल्ला स्वास्थ्य कार्यालय बझाङको आयोजना तथा खप्तडछान्ना गाउँपालिका वडा नम्बर ३ को समन्वयमा आज मेलतडी मावि लम्तडामा स्वास्थ्य शिविर सञ्चालन गरिएको हो ।

शिविरमा कक्षा १ देखि १० सम्मका विद्यार्थीहरुको आँखा, कान र दाँत सम्बन्धि चेकजाँच गरिएको खप्तडछान्ना गाउँपालिका वडा नम्बर ३ वडाध्यक्ष गौरी अधिकारी रावलले जानकारी दिनुभयो । उक्त शिविरबाट २ सय १२ जना विद्यार्थीहरुले सेवा लिएका छन् ।

प्राय : बालबालिकाहरुले स्वास्थ्यलाई खासै ध्यान नदिने तथा समस्यालाई सामान्य सोचेर चेकजाँच नै नगर्ने हुनाले विद्यार्थीहरुको स्वास्थ्य अवस्थालाई मध्यनजर गर्दै वडामा विद्यालय स्तरीय स्वास्थ्य शिविर सञ्चालन गरेको वडाध्यक्ष अधिकारीले बताउनुभयो ।

उहाँले बालक स्वस्थ रहे मात्रै गुणस्तरीय शिक्षा प्राप्त गर्ने भएकाले उनिहरुको स्वास्थ्यलाई अभिभावकहरुले पनि विशेष निगरानी गर्नुपर्ने बताउनुभयो । जिल्ला र स्थानिय तहका स्वास्थ्यकर्मिहरुले सेवा प्रदान गरेको शिविरमा विद्यार्थी, शिक्षक तथा वडाका कर्मचारी र प्रतिनिधिहरुको उपस्थिति रहेको थियो ।