खप्तडछान्नामा सञ्चालित पालिकास्तरीय राष्ट्रपति रनिङ शिल्ड सम्पन्न, प्रतियोगिताको उपाधी लामातोला माविलाई  

बझाङ : खप्तडछान्ना गाउँपालिकामा सञ्चालित राष्ट्रपति रनिङ शिल्ड प्रतियोगिता सम्पन्न भएको छ । राष्ट्रका लागि खेलकुद, स्वास्थ्यका लागि खेलकुद भन्ने मुल नाराका साथ यहिँ पुुस १४ गतेदेखि सुरु भएको तेस्रो पालिकास्तरीय राष्ट्रपति रनिङ शिल्ड प्रतियोगिता आज सम्पन्न भएको हो ।

प्रतियोगिताकोे उपाधी दुर्गा लामातोला माविले जितेको छ । ११ स्वर्ण प्राप्त गर्दै लामातोला माबिले प्रथम स्थान हाँसिल गरेको खप्तडछान्ना गाउँपालिकाका शिक्षा संयोजक हरि प्रसाद सोतीले जानकारी दिनुभयो । प्रतियोगितामा दोस्रो भएको महेश्वरी मावि गडरायले ९ स्वर्ण प्राप्त गरेको छ । त्यस्तै ४ स्वर्ण सहित खप्तड मावि कालुखेतीले तृतीय स्थान हाँसिल गरेको छ । दुर्गामहालिङ मावि चौकाले ३ स्वर्ण र कोटिखेत मावि बयानाले १ स्वर्ण हात पारेको शिक्षा संयोजक सोतीले बताउनुभयो ।

दुर्गामहालिङ माविको चौकाको खेलमैदानमा सञ्चालन भएको प्रतियोगितामा पालिका भित्रका ८ वटा विद्यालयको सहभागिता रहेको थियो । दुर्गामहालिङ मावि चौकाका विद्यालय व्यवस्थापन समिती अध्यक्ष बर्क बहादुर रोकायाको अध्यक्षतामा सञ्चालन भएको समापन समारोहमा गाउँपालिका उपाध्यक्ष विष्णु थापा प्रमुख आतिथी रहनुभएको थियो । कार्यक्रममा सबै वडाका वडा अध्यक्षहरु, शिक्षक, विद्यार्थी लगायत स्थानियहरुको सहभागिता रहेको थियो ।