निङ्गाला काट्न गएका थापा तीन दिनपछि मात्रै जंगलमा मृत भेटिए 

मष्टा गाउँपालिकामा एक जना पुरुष मृत भेटिएका छन् । मष्टा गाउँपालिका वडा नम्बर १ रनाडाका करिब ३५ वर्षिय सत्य थापा मृत अवस्थामा भेटिएका हुन् । उनी यही पुस ८ गते बिहान १० बजे मालिका जंगलमा नीङ्गाला काट्न एक्लै हिडेका थिए ।

श्रीमती भारत गएकाले थापा साना पाँच छोराछोरीसँगै घरमा बस्दै आएका थिए । त्यो दिन उनी एक्लै जंगल हिडेकाले उनका साना छोराछोरीलाई र स्थानीयलाई उनको बारेमा जानकारी थिएन । 

मंगलबार(आज ) तेस्रो दिन स्थानीयहरुले खोजी गर्दा उनी सानो मालिका वनको तल जंगलमा लडेर मृत अवस्थामा भेटिएको उनका आफन्त बिजय विष्टले जानकारी दिनुभयो ।

उनको शव ल्याउन मानिस नभएकाले हाल शव जंगलमै रहेको र प्रहरीलाई जानकारी गराएकाले बुधबार चौथो दिन मात्रै शव घर ल्याउने तयारी भइरहेको आफन्त विष्टले बताउनुभयो ।