बुंगल नगरपालिकामा महिलाहरुका लागि निःशुल्क स्वास्थ्य शिविर सम्पन्न 

बुंगल नगरपालिकामा महिलाहरुका लागि निःशुल्क स्वास्थ्य शिविर सम्पन्न भएको छ । ग्रामिण क्षेत्रका महिलाहरुमा तल्लो पेट तथा पाठेघर खस्ने जस्ता स्वास्थ्य समस्या देखिने गरेको भएपनि खुलेर नआउदा समस्या बल्झीदै गएको छ । दलित सहयोग समाजको समान व्यवहार परियोजना र बुंगल नगरपालिका वडा ९, १० र ११ को सहयोगमा तथा देउलीकोट स्वास्थ्य चौकीको आयोजनामा महिलाहरुका लागि निःशुल्क स्वास्थ्य शिविर सञ्चालन भएको थियो ।

देउलीकोट स्वास्थ्य चौकीमा संचालन भएको स्वास्थ्य शिविरबाट साविक देउलीकोट गा.वि.सका २ सय ७९ जना महिलाहरुले सेवा लिएको बुंगल नगरपालिका वडा नं ९ का अध्यक्ष हरीश सिंहले बताए । ग्रामिण क्षेत्रका महिलाहरु अझैपनि स्वास्थ्य समस्यामा नखुल्ने र दलित सहयोग समाजको विभिन्न परियोजना मार्फत जनचेतना कार्यक्रम मार्फत खुल्न थालेपछि शिविरको आयोजना गरिएको दलित सहयोग समाजका टिम लिडर सुनिल नेपालीले बताए । शिविरमा महिलाहरुको तल्लो पेट सम्बन्धि रोगहरु तथा पाठेघर खसेको बिरामीहरुको स्त्री रोग विशेषज्ञ महिला डाक्टरद्वारा भिडियो एक्सरे लगाएतका निशुल्क उपचार तथा परामर्श दिने कार्य गरिएको थियो ।