खप्तडछान्ना गाँउपालीकाको विजाडी गाड पुलको निमार्ण कार्य अलपत्र

बझाङ सेती लोकमार्ग अन्तर्गत खप्तडछान्ना गाँउपालीका –७ विजाडी गाडमा निर्माणाधीन पक्की पुल ५ वर्षदेखि अलपत्र अवस्थामा छ । निर्माणाधीन पुलको काम छोडेर ठेकेदार सम्पर्क विहीन भएपछि एक वर्षदेखि निमार्णको काम रोकिएको छ । निमार्णको अन्तिम चरणमा पुगिसकेको पुलको काम छोडेर ठेकेदार सम्पर्कविहीन भएपछि गडराय, धर्तीबाडा, गोर्खाली, लामागडा, बिणालगायत गाउँका श्रमिक र स्थानीय पसले, होटल सञ्चालकदेखि ढुवानी व्यवसायीहरुले आफुले पाउनु पर्ने रकम नपाएको बताएका छन ।

पुलको ढलानका बेला गिट्टी कुटेको ज्याला २५ हजार रुपैयाँ आफुले नपाएको खप्तडछान्ना गाउँपालिका–७ धर्तीबाडाकी चौरा चौहानले दुखेसो गर्नुभयो । चौहानले आफु मात्र नभई गाँउकै धेरै महिलाले गिट्टी कुटेको, बालुवा बोकेको र पुल निर्माणका क्रममा मजदुरी गरेको रकम पाउन बाँकी रहेको तर रकम नतिरेर ठेकेदार सम्पर्कविहीन भएपछि पैसा डुब्ने हो कि भन्ने चिन्तामा रहेको बताउनुभयो । 

२०७५ मा ठेक्का स्वीकृत भएर निर्माण सुरु भएको उक्त पुल निर्माणको जिम्मा अमर कन्स्ट्रक्सनले पाएको थियो । पाँच करोड करोड २६ लाख लागतमा निर्माण भइरहेको उक्त पुल निर्माणको काम तीन वर्षभित्र सम्पन्न गर्नुपर्ने भनिए पनि हालसम्म अधुरै रहेको छ । २०७८ मा पुलको ढलान बाढीले बगाएका कारण काम ढिलो भएको र आफूले काम गर्न खटाएको प्रतिनिधिले स्थानीयबाट रकम लिएर भागेका अमर कन्स्ट्रक्सनका सञ्चालक भद्र शाहीले बताउनुभयो । आफुले पुल निमार्णको लागी १ करोड ९० लाख मात्रै भुक्तानी पाएको बताउँदै अहिले म्याद थपको प्रक्रिया अघि बढेको र केही दिनभित्रै काम सुरु हुने शाहीको भनाई छ ।  

उक्त पुलको काम हेर्ने जिम्मा यसअघि अछामस्थित सेती लोकमार्गको कार्यालयलाई रहेको र केही दिन अगाडि मात्रै उक्त पुल निर्माणको काम हेर्ने गरी सेती लोकमार्ग उत्तरखण्ड (चैनपुर–ताक्लाकोट) को कार्यालयमा फाइल आएको चैनपुर ताक्लाकोट सडक कार्यालयले जनाएको छ ।