बैंक टाढा भएपछि केदारस्यूँ- ८ ले वडाबाटै सामाजिक सुरक्षा भत्ता वितरण सुरु गर्‍यो

केदारस्यूँ गाउँपालिका वडा नं ८ ले वडामै सामाजिक सुरक्षा भत्ता वितरण गरेको छ । वडाले हरेक नागरिकको सहजताका लागि वडा कार्यालयबाटै सामाजिक सुरक्षा भत्ता वितरण गरेको हो । पहिलो चरणमा दूरीका हिसाबले बैंकसम्म पुग्न टाढा रहेका वडाबाट यो कार्यक्रम सञ्चालन गरेको छ । जनताको सेवा सहजताका लागि वडाले नागरिकलाई दृष्टिगत गर्दै पहिलो चरणमा यो सेवा दिन लागेको वडा अध्यक्ष सुरेस बहादुर जेठाराले बताउनुभयो ।

दूरी टाढा भएका कारण र वृद्धवृद्धा भएका ज्येष्ठ नागरिकलाई बैंकसम्म पुग्नुपर्ने बाध्यता र लाइन बस्नुपर्ने सास्ती बढी भएकाले यसको अन्त्यका लागि वडा कार्यालयबाटै सामाजिक सुरक्षा भत्ता वितरण गर्ने कार्यक्रम अघि बढेको उहाँले बताउनुभयो ।

सामाजिक सुरक्षा भत्ता वितरण गर्ने बैंक शाखाहरुसँगको छलफलपछि नेपाल ईन्भेष्टमेन्ट मेघा बैंकसँग सम्झौता गरी आवश्यकताका आधारमा वडामा पुगेर भत्ता वितरण गरेका छौँ” वडा अध्यक्ष जेठाराले भन्नुभयो । पहिलो चरणमा वडा अपाङ्ग अशक्त जेष्ठ नागरिकलाई प्राथमिकतामा राखेर काम गरेकाछौं ।

आवश्यकताअनुसार वडा कार्यालय र टोल टोलबाट सामाजिक सुरक्षा भत्ता वितरण गर्ने योजना रहेको वडा अध्यक्ष जेठाराले बताउनुभएको छ ।