तिहारको मुखैमा अनाथ र टुहुरा बालबालिकाकी साहारा बनिन् उपाध्यक्ष भण्डारी

तल्कोट गाउँपालिका उपाध्यक्ष पार्वती भण्डारी कुँवरले गाउँपालिकाभित्रका अनाथ र टुहुरा बालबालिकालाई लुगाकपडा वितरण गर्नुभएको छ ।

पूर्व घोषित कार्यक्रम अनुसार उपाध्यक्ष भण्डारीले आफ्नो सेवा सुविधाबाट बचेको रकमले तल्कोट गाउँपालिकाभित्रका ९० जना अनाथ र टुहुरा बालबालिकालाई लुगाकपडा वितरण गर्नुभएको हो ।

मंगलबार र बुधबार गरेर उपाध्यक्ष भण्डारीले वडा नम्बर ४, ५, ६ र ७ भित्रका अनाथ र टुहुरा बालबालिकालाई लुगाकपडा बाँडिसक्नुभएको छ भने अब १, २ र ३ वडाका बालबालिकालाई वितरण गर्न बाँकी रहेको तल्कोट गाउँपालिकाका निमित्त प्रमुख प्रशासकिय अधिकृत नरजित खड्काले बताउनुभयो ।

दशैंमा बाँड्ने योजना भए पनि कारणवश नसकिएको र अहिले तिहार आइरहेकाले लुगाकपडा बाँडेको निमित्त प्रमुख प्रशासकिय अधिकृत खड्काले बताउनुभयो । उपाध्यक्ष भण्डारी यसअघि पत्रकार सम्मेलन गरेर तल्कोट गाउँपालिकाभित्रका अनाथ र टुहुरा बालबालिकालाई सहयोग गर्ने बताउनुभएको थियो । 

लुगाकपडा पाएपछि खुशी हुँदै तल्कोट -५ की बालिका विनिता बिकले भनिन्,'तिहार आइरहेको छ । लगाउन लुगा कपडा थिएन । उपाध्यक्ष ज्यु हाम्रो साहारा बनेर आउनुभयो । सरकारले हेरेकाले खुशी लाग्यो। '

यस्तै तल्कोट ६ का सुवन कडायतले पनि उपाध्यक्षले आफूहरुलाई हिउँदे याम र तिहारका बेला ट्र्याक सुट र टिसर्ट दिदा खुशी लागेको बताउनुभयो ।