राम्रो प्रदर्शन गरेको भन्दै थलारा गाउँपालिकाले खेलाडीको मनोबल बढाउन पुरस्कार दिने

थलारा गाउँपालिकाले शिलदेवी मेलामा दोस्रो स्थान कब्जा गरेको खुशीयालीमा भलिबल खेलाडीलाई सम्मान गरेको छ । नेपाल खेलकुद महासंघ जिल्ला कमिटी बझाङले शिलदेवी मेलामा आयोजना गरेको पालिका स्तरीय मदन आश्रीत पुरुष भलिबल प्रतियोगितामा द्वितीय स्थान ल्याउन सफल गाउँ पालिका खेलाडीलाई सम्मान गरेको हो ।

प्रतियोगितामा राम्रो खेल प्रदर्शन गरेर गाउँपालिकाको सान बढाएको भन्दै खेलाडीको मनोबल उच्च राख्न गाउँपालिकाले सम्मान सहित पुरस्कृत गर्ने निर्णय गरेको थलारा गाउँपालिका अध्यक्ष प्रकाश रोकायाले बताउनुभयो ।

उहाँका अनुसार आइतबार बसेको कार्यपालिका बैठकले नेपाल खेलकुद महासंघ जिल्ला कमिटी बझाङले शिलदेबी मेलाको अवसरमा आयोजना गरेको मदन आश्रीत स्मृति पुरुष भलिबल प्रतियोगितामा द्वितीय स्थान ल्याउन सफल खेलाडीलाई जनही ५/५ हजार नगदसहित सम्मान गर्ने निर्णय गरेको हो ।

खेलाडीहरुले जितेर ल्याएको ट्रफी गाउँपालिकालाई हस्तान्तरण गरेका छन् भने खादासहित थलारा गाउँपालिकाले खेलाडीलाई सम्मान गरेको हो ।

नेपाल खेलकुद महासंघ जिल्ला कमिटी बझाङद्वारा आयोजित पालिका स्तरीय मदन आश्रीत स्मृति पुरुष भलिबल प्रतियोगितामा थलारा गाउँपालिका टिमले द्वितीय स्थान हासिल गर्दै ५५ हजार ५ सय ५५ रुपैयाँ नगद सहित ट्रफी, मेडल र प्रमाणपत्र जितेको थियो । खेलाडीको मनोवल बढाउन थलारा गाउँपालिकाले गरेको सम्मान स्वागतयोग्य रहेको खेलाडीहरुले प्रतिक्रिया दिएका छन् ।