बझाङमा लागुऔषध प्रयोगकर्ता र मेडिकल सञ्चालकको डरलाग्दो जालो सक्रिय, एक मेडिकल सञ्चालक पक्राउ

बझाङ सदरमुकाम चैनपुरमा लामो समयदेखि चलिरहेको न्यु चैन मेडिकलबाट सरकारबाट प्रतिबन्धित तथा विशेषज्ञ डाक्टरको अनुमति विना बिक्री वितरण गर्न नमिल्ने लागुऔषध बितरण भइरहेको पाइएको छ । आइतबार दिउँसो सुजन हेयर कटिङ पसलबाट लागुऔषध र पसल सञ्चालक पक्राउ गरेसँगै यस्तो रहस्य खुल्न आएको हो ।

सुजन हेयर कटिङ सेन्टरका सञ्चालक सुर्जन धामीले प्रहरीसँगको बयानका क्रममा चैन मेडिकलले ट्रामाडोल लगायतका लागुऔषध बिक्री वितरण गरिरहेको खुलेको हो । प्रहरीले यो बयानका आधारमा न्यु चैन मेडिकलका सञ्चालक प्रविन मण्डललाई पनि पक्राउ गरि जिल्ला अदालतबाट १० दिनको म्याद थप गरेर अनुसन्धानको लागि हिरासतमा राखेको जनाएको छ । 

यस्ता औषधी गम्भीर विरामी तथा घाइतेलाई प्रयोग गरिने भए पनि बझाङ लगायत सुदूरपश्चिमका युवाहरुले नशाको माध्यमबाट लागुऔषधका रुपमा प्रयोग गर्दै आएका छन् । बझाङमा पनि पछिल्लो समय यस्ता लागुऔषध प्रयोगकर्ता बढिरहेका छन् ।

घरका अभिभावक र प्रहरीलाई छलेर बझाङका विभिन्न फार्मेसीबाट कारोबार गरेर कुलतमा फसेका युवाहरुले लागुऔषध प्रयोग गरिरहेको प्रहरीले जनाएको छ । यस्ता कुलतमा फसेका धेरै युवाहरुले अहिले मेडिकलवालाले नदिए आक्रमणमा समेत उत्रिने गरेका छन् । केही समय अघि मात्रै जयपृथ्वी अस्पतालमा यसै विषयमा चिकित्सक माथि कुटपिट भएको थियो । लागुऔषध प्रयोगकर्ता १५ वर्षदेखि ३५ वर्षसम्मका बेरोजगार युवाहरु रहेको प्रहरीले बताएको छ ।

 अहिले यस्ता प्रयोगकर्ताहरु विशेष गरि पानकोट पुल पारी एक्लै बसेर नशा लिइरहेको अवस्थामा भेटिने गरेको गोलाई र पडेशका स्थानीयहरु बताउँछन् । बझाङमा अनुगमन नहुने हुँदा लागुऔषधको खुलेयाम बिक्री वितरण भइरहेको छ । घरमा पनि अभिभावकहरु व्यस्त हुने भएकाले आफ्ना छोराछोरीहरुको खासै वास्ता नगर्ने गरेका कारण युवाहरु लागुऔषधको लतमा फसिरहेका छन् । यस्ता लागुऔषध प्रयोगकर्ताबाट विभिन्न अनैतिक कार्य र हिंसात्मक गतिविधि पनि बढ्दै गइरहेका विभिन्न अध्ययनले देखाएको छ ।