राष्ट्र बैंकका प्रधान सहायक धामीद्वारा स्टेसनरी सामग्री सहयोग 

नेपाल राष्ट्र बैंकमा कार्यरत प्रधान सहायक अर्जुनबहादुर धामीले विद्यार्थीलाई स्टेसनरी सामग्री सहयोग गरेका छन् । उनले बझाङको छबिसपाथिभेरा गाउँपालिका–७ स्थित श्री सुर्मा आधारभूत विद्यालयमा अध्ययनरत अनाथ तथा टुहुरा, एकल बालबच्चाहरूलाई करिब १० हजार रुपैयाँ बराबरको कापी, कलम, पेन्सिल, औजार बक्सलगायत स्टेसनरी सामग्री सहयोग गरेका हुन् ।

प्रधान सहायक धामीले सो स्टेसनरी सामग्री जलजला सेरिनिसान बासुधारा सामुदायिक वन उपभोक्ता समितिले आयोजना गरेको एक कार्यक्रमका बीच विद्यालय व्यवस्थापन समिति (विव्यस) का अध्यक्ष अमर धामीलाई हस्तान्तरण गरे।उनले आफूले अध्ययन गरेको विद्यालयका विद्यार्थीलाई सहयोग गर्न पाउँदा गौरान्वित महसुस गरेको बताए। 

‘मैले यही विद्यालयमा आधारभूत शिक्षा हासिल गरेको थिए । त्यतिबेला पनि धेरै समस्या थिए । आफूले भोगेका समस्या स्मरण गर्दै थोरै भए पनि सहयोग होस् भनेर अनाथ तथा टुहुरा, एकल बालबच्चाहरूलाई स्टेसनरी सामग्री प्रदान गरिएको हो । उनीहरूलाई सहयोग गर्न पाएकोमा खुसी लागेको छ,’ राष्ट्र बैंक  धनगढी कार्यालयमा कार्यरत धामीले भने । 

विव्यस अध्यक्ष अमर धामीले प्रधान सहायक धामीले प्रदान गरेको स्टेसनरी सामग्री विद्यालय खुलेलगत्तै सम्बन्धित विद्यार्थीलाई हस्तान्तरण गरिने बताए।