तल्कोट गाउँपालिकामा आजबाट दशैं मेला सुरु, भोलीदेखि देउडा र भलिबल खेलहरु सुरु हुने

तल्कोट गाउँपालिकामा आजबाट दशैं मेला सुरु भएको छ । तल्कोट गाउँपालिका ५ दुर्गाभवानी खेल मैदानमा सुरु भएको दशैं मेलामा आज पहिलो दिन तल्कोटका एकदेखि सात वडासम्मका कलाकार र आयोजकबाट साँस्कृतिक प्रस्तुती राखिएको थियो ।

आजको उद्घाटन कार्यक्रम राष्टि?य युवा संघ तल्कोटका अध्यक्ष चिरञ्जीवी  बोहरा को अध्यक्षतामा सञ्चालन भएको थियो भने प्रमुख अतिथि तल्कोट गाउँपालिका अध्यक्ष कलक रोकाया रहनुभएको थियो । दशैं मेला अन्तर्गत भोलीदेखि देउडा खेल र भलिबल प्रयोगीता सुरु हुने दशैं मेला व्यवस्थापक धनबहादुर विष्टले जानकारी दिनुभयो ।

देउडा खेलमा बाजुराका नम्रता जोशी र जयपृथ्वी नगरपालिका वडा नम्बर ११ प्रकाश खत्री, भीम धामी, विरेन्द्र विष्ट र सबै वडाका स्थानीय कलाकारहरु उपस्थित हुने पनि व्यवस्थापक विष्टले बताउनुभयो । उहाँका अनुसार भलिबल प्रतियोगीताका लागि बिहान ७ बजेभित्र टाइसेट हुने भएकाले सम्पुर्ण प्रतियोगी टिमलाई खेलाडीको नाम र शुल्क बुझाउन आयोजकले अनुरोध गरेको छ । 

यसैगरी मष्टा गाउँपालिका १ कोटदेवलमा पनि घचाया मेला सुरु भएको छ । आजबाट सुरु भएको मेलाको उद्घाटन मष्टा गाउँपालिका अध्यक्ष ज्ञानबहादुर बोहराले गर्नुभएको छ । मेलामा खुल्ला महिला पुरुष भलिबल प्रतियोगीतासँगै देउडा तथा साँस्कृतिक कार्यक्रम भइरहेका छन् ।