आइपिएल क्रिकेट : हारसँगै बैंग्लोरको शीर्ष स्थानमा रहने अवषर गुम्यो

इन्डियन प्रिमियर लिग, आइपिएल क्रिकेटमा पन्जाब किङ्सले रोयल च्यालेन्जर्स बैंग्लोरलाई पराजित गरेको छ । गएराति अहमदाबादमा भएको खेलमा पन्जाबले बैंग्लोरलाई ३४ रनले पराजित गरेको हो ।

पन्जाबले दिएको १ सय ८० रनको लक्ष्यसहित जवाफी ब्याटिङमा उत्रिएको बैंग्लोर निर्धारित २० ओभरमा ८ विकेट गुमाएर १ सय ४५ मा समेटियो । 

बैंग्लोरका लागि कप्तान विराट कोहलीले सर्वाधिक ३५ रन जोडे । रजत पतिदारले ३१ रन बनाए । हर्सल पटेलले ३१ रन बनाउँदा केली जेमिसन १६ रनमा अविजित रहे ।

बैंग्लोरलाई सस्तैमा समेट्न पन्जाबका हरप्रित ब्रारले ३ विकेट लिए । रवि बिस्नोईले २ तथा रिली मेरेदिथ, मोहमद शामी र क्रिस जोर्डनले १÷१ विकेट लिए ।

यसअघि टस हारेर पहिले ब्याटिङ गरेको पन्जाबले २० ओभरमा ५ विकेट गुमाएर १ सय ७९ रन बनाएको थियो । पन्जाबका लागि कप्तान लोकेश राहुलले अर्धशतकीय इनिङ्स खेले । अविजित रहेका राहुलले ५७ बलमा ७ चौका र ५ छक्कासहित ९१ रन बनाए ।

यस्तै क्रिस गेलले ४६ रन जोड्दा हरप्रितले अविजित रहदै २५ रन बनाए । बैंग्लोरका केली जेमिसनले २ विकेट लिए । डानिल साम्स, युजभेन्द्र चहल र सहबाज अहमेदले १÷१ विकेट लिए ।

बैंग्लोर माथिको जितसँगै पन्जाबले लिगमा तेस्रो जित निकालेको छ । पन्जाबले ७ खेलमा ६ अंक जोडेको छ । पन्जाब पाँचौ स्थानमा उक्लिएको छ । 

यता, हारसँगै बैंग्लोरले शीर्ष स्थानमा उक्लने मौका गुमाएको छ । बैंग्लोर ७ खेलमा १० अंक जोड्दै तेस्रो स्थानमा रहेको छ ।