भूकम्पले भत्किएको बालविकास माविलाई नेश्नल लाईफ ईन्स्योरेन्सको आर्थिक सहयोग 

भूकम्पबाट बढी क्षति भएको बझाङको जयपृथ्वी नगरपालिका ४ गोलाईको बालविकास माविलाई नेश्नल लाइफ ईन्स्योरेन्स कम्पनीले पुस्तकालय भवन निर्माणका लागि आर्थिक सहयोग प्रदान गरेको छ । विद्यालयमा शुक्रवार एक कार्यक्रमकाबीच इन्स्योरेन्सका प्रमुख कार्यकारी अधिकृत (सिईओ) सुरेश प्रशाद खत्रीले विधालयलाई ८ लाख ५१ हजारको चेक हस्तान्तरण गर्नु भएको हो । भूकम्पले भत्काएको विद्यालयमा केही हदसम्म भए पनि पुर्नर्निर्माणमा सहयोग पुगाउने उदेश्यले कम्पनीको सामाजिक उत्तरदायित्व कार्यक्रम अन्तर्गत सो रकम हस्तान्तरण गरिएको प्रमुख कार्यकारी अधिकृत खत्रीले बताउनुभयो ।

बझाङको जयपृथ्वी नगरपालिका -१० चैनपुर जन्मथलो भएका खत्री आफै विद्यालयमा पुगेर रकम हस्तान्तरण गर्नुभएको हो । कार्यक्रममा बोल्नुहुँदै खत्रीले भूकम्पले क्षतिग्रस्त बनाएको आफ्नो गाउँठाउँमा संस्थागत रुपमा केही मात्रामा भए पनि सहयोग गर्न पाउँदा खुसी भएको बताउनुभयो ।

विद्यालयलाई प्रदान गरिएको आर्थिक सहयोगबाट एक कोठे पुस्तकालय निर्माण गरिने विधालयका प्रधानाध्यापक केशबहादुर खातीले बताउनुभयो । गएको असोज १६ गते आएको भूकम्पले बालविकास माविको भवन भत्किएर बस्न नमिल्ने अवस्थामा भएपछि पठनपाठनमा समस्या भएको थियो ।